Italııa SІM orynbasary Qazaqstanǵa saparmen keledi
NUR-SULTAN. QazAqparat - Italııa Respýblıkasy Syrtqy ister mınıstriniń orynbasary Manlıo Dı Stefanonyń Qazaqstanǵa saparmen keledi. Bul týraly búgin brıfıng barysynda QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«13-14 qarashada Italııa Respýblıkasy Syrtqy ister mınıstriniń orynbasary Manlıo Dı Stefano Qazaqstanǵa saparmen keledi. Sapar barysynda QR Syrtqy ister mınıstri Muhtar Tileýberdimen jáne Tsıfrlyq damý jáne aeroǵarysh ónerkásibi, Qarjy, Aýyl sharýashylyǵy, Ekologııa, geologııa jáne tabıǵı resýrstar mınıstrlikteriniń basshylarymen kezdesýler josparlanýda», - dedi Aıbek Smadııarov.
Onyń dereginshe, kelissózder barysynda taraptar saıası ózara is-qımyl, saýda-ınvestıtsııalyq yntymaqtastyq, qorshaǵan ortany qorǵaý, aýyl sharýashylyǵy, tsıfrlandyrý jáne basqa da máseleleri boıynsha ekijaqty yntymaqtastyqtyń jaı-kúıi men perspektıvalaryn talqylaıdy.
«Sondaı-aq, Manlıo Dı Stefanonyń «Samuryq-Qazyna» UÁQ AQ qoldaýymen Italııanyń Qazaqstandaǵy elshiligi uıymdastyrǵan Qazaqstan-Italııa bıznes-forýmyna qatysýy qarastyrylǵan», - dedi ol.
