Italııa sahnasyndaǵy qazaq qyzy: Áıgerim Altynbek «La Skalada» óner kórsetpek

ASTANA. KAZINFORM – Áıgili ıtalıandyq opera sahnasy «La Skalada» qazaqstandyq ánshi óner kórsetpek. Tanymal teatrda taǵylymdamadan ótetin Áıgerim Altynbek Jibek Joly arnasynyń «Búgin LIVE» stýdııasyna qonaq boldy.

— Men úsh jyldan beri Italııada turyp, bilim alyp jatyrmyn. «La Skala» teatryna túsý — meniń armanym bolatyn. Italııaǵa kelýimniń basty sebebi de osy. Biraq bul ońaı bolǵan joq. «La Skala» teatrynyń akademııasyna tikeleı baryp oqýǵa qabyldaný múmkin emes. Eń aldymen, ıtalıan tilin jaqsy meńgerý qajet. Sondaı-aq, konservatorııalar men akademııalarda aldyn ala bilim alý kerek. Bul talaptar olar úshin óte mańyzdy, — deıdi opera ánshisi.

Qazaqstandyq arý óz armanyna jetý úshin Italııada konservatorııa da oqyǵan.

— Bıyl Parma qalasyndaǵy Arrıgo Boıto atyndaǵy konservatorııany aıaqtadym. Bul — Italııadaǵy eń alǵashqy konservatorııalardyń biri. Munda túsý de, oqý da ońaı bolmady. Barlyq oqý baǵdarlamalary ıtalıan tilinde ótedi. Bilim berý júıesiniń dárejesi óte joǵary, sabaq barysy kúrdeli, — deıdi ol.

Áıgerim Altynbektiń aıtýynsha, oǵan ıtalıan tilin úırený asa qıynǵa soqpapty.

— Meniń ıtalıan tiline degen qyzyǵýshylyǵym joǵary bolǵan sekildi. Óıtkeni bizdiń oryndap júrgen kóptegen shyǵarmalarymyz ıtalıan tilinde. Sol shyǵarmalardy oryndamas buryn mindetti túrde mátinderin jattap, aýdarmasyn jasaý kerek boldy. Osylaısha, tildi úırenýge qajetti baza qalyptasty. Keıin grammatıkany tereńdetý úshin Qazaqstanda 2-3 aı daıyndaldym. Sodan keıin konservatorııaǵa túsý úshin emtıhandarymdy tapsyrdym. Biraq teorııany oqyǵanyń bir basqa, al ıtalııalyqtarmen ıtalıansha sóılesý — múlde basqa dúnıe, — deıdi ánshi.

Stýdııa qonaǵy «La Skala» teatrynyń akademııasyna túsý ońaı bolmaǵanyn aıtady.

— «La Skala» teatrynyń akademııasyna túsý úshin úsh jyl boıy tyńǵylyqty daıyndaldym. Taǵylymdamam eki jylǵa josparlanǵan. Alǵashqy irikteý kezeńine 400-den asa adam qatysty. Solardyń ishinen 90 adam jandy tyńdalymǵa ótti. Keıin jartylaı fınalǵa joldama berildi. Jartylaı fınal eki bólimnen turdy. Birinshi bólimde kameralyq mýzyka men arııalar oryndadyq. Al ekinshi bólimde akterlik jáne mýzykalyq qabiletimiz tekserilip, suhbat ótkizildi. Sońǵy kezeń — «La Skala» sahnasynda ótti. Qorytyndysynda 400 adamnyń ishinen 12 adam ǵana tańdalyp alyndy, — deıdi Áıgerim.

Opera ánshisi qazaq klassıkalyq án ónerin álemge tanytqysy keletinin jetkizdi.

— Áleýmettik jelilerde kóp adam meni Dımashpen salystyryp jatyr. Osy tusta aıtqym keledi, Dımash — qazaqtyń estrada janryn álemge tanytyp júr. Al men klassıkalyq baǵytta elimdi tanytqym keledi, — deıdi stýdııa qonaǵy.

Eske sala keteıik, Áıgerim Altynbek ótken joly Kazinform agenttigine bergen suhbatynda «Óner adamdary halyqty mádenıetke tárbıeleıdi» degen pikir bildirgen edi.