Italııa Ryanair kompanııasyna 1 mlrd eýroǵa deıin aıyppul salýy múmkin

ASTANA. KAZINFORM — Irlandııalyq Ryanair áýe kompanııasyna Italııanyń monopolııaǵa qarsy basqarmasy tarapynan basym pozıtsııany teris paıdalanǵany úshin 500 mıllıonnan 1 mıllıard eýroǵa deıin aıyppul salynýy yqtımal, dep habarlaıdy AZERTADJ.

Másele bıznes-modeldiń negizgi elementin dereý ózgertý talaptarymen baılanysty, bul model áýe kompanııasyna osy ýaqytqa deıin rekordtyq kiris pen paıda ákelgen. Sheshim 22 jeltoqsanda qabyldanýy josparlanǵan, dep habarlaıdy ıtalıandyq Corriere della Sera gazeti.

2023 jylǵy qyrkúıekte bastalǵan tergeý aıaqtalýǵa jaqyn. Italııanyń monopolııaǵa qarsy basqarmasy Ryanair-dy ıtalıandyq avıatsııa naryǵynda basym pozıtsııasyn teris paıdalanyp, jeke jáne onlaın týrıstik agenttikterge básekelestik múmkindigin shekteý úshin árekettendi dep aıyptap otyr.

Basqarma deregi boıynsha, ırlandııalyq áýe kompanııasy Italııada ishki jáne eýropalyq baǵyttar boıynsha naryqtyń 38–50%-yn ıemdenip, sońǵy jyldary birneshe shekteý sharalaryn engizgen. Bul deldaldarǵa bılet satý múmkindigin qıyndatqan.

Osy shekteýlerge mynalar kiredi:

• Onlaın agenttikter arqyly bılet satyp alatyn jolaýshylarǵa mindetti tulǵa tekserisi;

• «Shield» dep atalatyn, «standartqa saı emes» brondaýlardy avtomatty túrde bloktaıtyn júıe;

• Týrıstik agenttiktermen «teńgerimsiz» dıstrıbıýtorlyq kelisimsharttar.

Monopolııaǵa qarsy basqarma pikirinshe, bul sharalar tutynýshylardyń tek kompanııanyń veb-saıtyna júginýine, baǵany salystyrý, pakettik usynystar jáne tańdaý erkindigin shekteýge alyp kelgen.

Italııanyń monopolııaǵa qarsy basqarmasy (ICA) anyqtaǵandaı, Ryanair básekelestikti is júzinde emes, jasandy shekteýler men onlaın agenttikterdiń básekege qabilettiligin tómendetýge baǵyttalǵan strategııalyq ádister arqyly tejegen.

Ryanair barlyq aıyptaýdy joqqa shyǵaryp otyr. Kompanııa eýropalyq erejeler ony onlaın týrıstik agenttiktermen kelisim jasaýǵa mindettemeıdi deıdi jáne onyń tikeleı satý júıesi naryqtaǵy eń arzan baǵany qamtamasyz etedi dep túsindiredi.

Eger tergeý nátıjeleri rastalsa, Ryanair jyldyq jahandyq aınalymynyń 10%-yna deıin aıyppul tóleýge májbúr bolady, biraq naqty jaǵdaıda aıyppul Italııadan túsken kiristerge (sońǵy úsh jylda jylyna orta eseppen 2,7 mıllıard eýro) negizdelip esepteledi. Sonymen qatar, túzetý sharalaryn qabyldaý talap etilýi múmkin.

Budan buryn ırlandııalyq Ryanair kompanııasyna tıesili ushaq bortyndaǵy órtten 18 adam zardap shekkenin jazǵan edik.