Italııa Rojdestvo merekesinde «qyzyl aımaqqa» kiredi

RIM. QazAqparat – Italııanyń Premer-Mınıstri Djýzeppe Konteniń úkimeti Italııany rojdestvolyq merekelerge shekteý qoıyp, COVID-19 ınfektsııasynyń úshinshi tolqynynyń aldyn alýǵa nıetti, dep habarlaıdy QazAqparat ANSA saıtyna silteme jasap.

Úkimet búkil Italııany qyzyl aımaqqa engizedi dep kútilýde, ıaǵnı barlar, meıramhanalar men mańyzdy emes dúkender jeksenbide, ulttyq merekelerde jáne birneshe kún buryn jabylýy kerek, dep habarlady Konte óziniń úkimetin qoldaıtyn partııalarmen kezdesýde.

Bul shekteýler Rojdestvo merekesinen 6 qańtardaǵa deıin bolmaq.

Osy kezeńdegi jumys kúnderi Italııa «qyzǵylt sary aımaqta» bolady. Bul kezde dúkender ashyq, al barlar men meıramhanalar jabyq bolady. Sonymen qatar 14 jasqa deıingi balalardy eseptemegende, eń kóp degende eki adamǵa basqa úılerge barýǵa ruqsat etiledi.

Konteniń kabıneti 18:00-de óńirlik gýbernatorlarmen kelissóz júrgizip, jańa shekteýleri bar jarlyqty qaraý úshin kezdesýi kerek.

Óńirlik máseleler jónindegi mınıstr Franchesko Bochcha Sky TV-ge bergen suhbatynda: «Biz álsiz jáne qart adamdardy qorǵaýǵa sheshim qabyldaýymyz kerek. Sol sebepti árqaısysymyz Rojdestvony óz úıimizde ótkizgenimiz durys», – dedi.

Sondaı-aq úkimet 21 jeltoqsannan 6 qańtarǵa deıin óńirler arasyndaǵy qozǵalysty shekteıdi. Turǵyndar Rojdestvo, Áýlıe Stefan kúni jáne Jańa jylda óz qalalaryn tastap eshqaıda shyǵa almaıdy. Alaıda 5000-nan az halqy bar qalalar úshin basqasha qarastyrylǵan. Mundaı shaǵyn qala turǵyndary 30 km radıýsta, provıntsııa astanalarynan bólek baǵyttarǵa jol júre alady.

22:00-den bastalatyn túngi komendanttyq saǵat óz kúshinde qalady.