Italııa Prezıdenti eki el arasyndaǵy senimdi dıalog úshin Qasym-Jomart Toqaevqa rızashylyǵyn jetkizdi

ASTANA. KAZINFORM – Italııa Prezıdenti seriktestikti odan ári nyǵaıtýdyń mańyzyn atap ótip, eki el arasyndaǵy senimdi dıalog pen ózara túsinistikti nyǵaıtýǵa qosqan úlesi úshin Qasym-Jomart Toqaevqa rızashylyǵyn jetkizdi. Bul týraly Aqorda málim etti.

– Biz úshin bul sapardyń máni zor. Sizdiń byltyr Rımge jasaǵan saparyńyz ózara qarym-qatynastyń mańyzdy kezeńi retinde yntymaqtastyǵymyzdyń odan ári nyǵaıýyna berik negiz qalady. Bul qadamdar seriktestigimizge barlyq baǵytta erekshe sıpat beredi. Mádenıet salasyndaǵy yqpaldastyǵymyz belsendi damyp keledi. Italııa Astanada Ortalyq Azııadaǵy alǵashqy Mádenıet ortalyǵyn ashady. Elordanyń bir kóshesin Marko Polonyń qurmetine ataý týraly usynysyńyz qos memlekettiń baılanysyn odan ári tereńdetýge beıil ekenińizdi kórsetedi. Bul qoldaýyńyz úshin Sizge shynaıy rızashylyǵymdy bildiremin, – dedi Serdjo Mattarella.

Kelissóz sońynda taraptar Prezıdent Serdjo Mattarellanyń resmı sapary Qazaqstan – Italııa qarym-qatynasy tarıhynyń jańa paraǵyn ashatynyna senim bildirdi. 

Eske sala keteıik, Aqordada Memleket basshysy Qasym-Jomart Toqaev elimizge resmı saparmen kelgen Italııa Prezıdenti Serdjo Mattarellany qarsy aldy.

Elorda kósheleriniń birine Marko Polo esimi beriletini habarlandy.

Italııa Astanada óziniń mádenı ortalyǵyn ashady. Bul Ortalyq Azııa óńirindegi mundaı alǵashqy mádenı ortalyq bolmaq.

Qasym-Jomart Toqaev Italııa Prezıdenti Serdjo Mattarellany birinshi dárejeli «Dostyq» ordenimen marapattady.