Italııa Prezıdenti birinshi dárejeli «Dostyq» ordenimen marapattaldy

ASTANA. KAZINFORM — Memleket basshysy Qasym-Jomart Toqaev Italııa Prezıdenti Serdjo Mattarellany birinshi dárejeli «Dostyq» ordenimen marapattady. 

Bul týraly Aqordada Italııa Prezıdenti Serdjo Mattarellamen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.

— Italııa — Qazaqstannyń Eýropa odaǵyndaǵy mańyzdy ári senimdi strategııalyq seriktesi. Búginde eki el arasynda berik dostyq pen syılastyqqa negizdelgen baılanys ornady. Barlyq deńgeıdegi yqpaldastyǵymyz qarqyndy damyp kele jatyr. Italııa Prezıdenti osy oń úrdiske qoldaý bildirip, eleýli úles qosyp keledi. Men muny joǵary baǵalaımyn. Sol sebepti búgin men joǵary mártebeli Prezıdent Serdjo Mattarella myrzaǵa birinshi dárejeli «Dostyq» ordenin tabystadym, — dedi Qasym-Jomart Toqaev Aqordadaǵy kelissózderden keıingi birlesken málimdeme barysynda.

Memleket basshysy qazaq halqynyń Italııa halqyna degen qurmeti erekshe ekenin basa aıtty.

— Eki el arasyndaǵy ózara tyǵyz qarym-qatynas dástúrli dostyqqa negizdelgen. Biz Italııanyń búkil álem órkenıetiniń damýyna qosqan zor úlesin moıyndaımyz. Bul marapatty qazaq eliniń sizge jáne sizdiń elińizge degen rııasyz kóńili dep qabyldańyz, — dedi Prezıdent. 

Aıta ketelik Qasym-Jomart Toqaev Italııa Prezıdentin Aqordada qarsy alǵan edi.