Italııa Premer-mınıstri: Ortalyq Azııa — Eýropa men Azııa arasyndaǵy baılanys beketi

ASTANA. KAZINFORM — Memleket basshysy Qasym-Jomart Toqaevpen birge Astana halyqaralyq forýmynyń ekinshi kúnindegi plenarlyq sessııaǵa qatysqan Italııa Mınıstrler Keńesiniń tóraǵasy Djordja Melonı Ortalyq Azııa elderiniń taǵdyryn óz eliniń tarıhymen salystyrdy. 

— Men jalpy geosaıasatker emespin. Biraq qazirgi ahýaldy baǵamdap otyrmyn jáne bul aımaq árdaıym Shyǵys pen Batys arasyndaǵy jolaıryq bolyp kelgenin, jahandyq stsenarıde onyń strategııalyq mańyzy artyp kele jatqanyn kórip otyrmyn, — deıdi ol.

Italııa Premer-mınıstri Ortalyq Azııaǵa álemniń nege dál qazir nazar aýdaryp otyrǵanyna toqtaldy.

— Qazirgideı aýyr kezeńde Ortalyq Azııa árdaıym jer shary ǵasyrlar boıy bastan ótkerip kele jatqan transformatsııa men ózgeris ortalyqtarynyń arasynda kópir bolyp otyrdy. Bul aımaq — eki qurlyq arasyndaǵy kópir, Eýropa men Azııa arasyndaǵy baılanys beketi jáne qaqtyǵystar arasyndaǵy baılanys aılaǵy.

Álem qazir barǵan saıyn tyǵyz baılanysqa muqtaj. Men ıtalııalyq retinde, Eýropa men Afrıkanyń ortasynda jatqan, Jerorta teńizindeı jahandyq ortalyqtaǵy ulttyń qyzy retinde mundaı geografııalyq jaǵdaıdyń qanshalyqty mańyzdy ekenin túsinemin, — dedi Djordja Melonı.

Aıta keteıik, keshe keshke Italııa premeri Qazaqstanǵa resmı saparmen keldi. 

Sondaı-aq, mártebeli meımannyń qatysýymen «Ortalyq Azııa — Italııa» sammıti ótedi. 

Eske salsaq, elordada kesheden beri Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.