Italııa Premer-mınıstri otstavkaǵa ótinish beretinin málimdedi
RIM. QazAqparat – Italııanyń Premer-mınıstri Djýzeppe Konte seısenbi kúni keshqurym otstavkaǵa ketetini jóninde málim etti. Ol mundaı málimdemeni koalıtsııalyq úkimetke senimsizdik bildirý týraly «Lıga» bıleýshi partııasynyń ótinimhat joldaý sheshiminen keıin jasady, dep habarlaıdy QazAqparat Reuters-ke silteme jasap.
Djýzeppe Konte Lıganyń arańdatýynan týyndaǵan saıası tártipsizdik máseleleri boıynsha parlament múshelerine qarata sóılegen sózinde Prezıdent Serdjo Mattarellaǵa otstavkaǵa ketý týraly ótinish túsiretinin jetkizdi.
Óz kezeginde Italııa basshysy merziminen buryn saılaý ótkizýdiń qajettiligin nemese jańa bıleýshi koalıtsııany qurý týraly sheshýi tıistigi atap ótiledi.
Italııanyń Premer-mınıstri qalyptasqan jaǵdaıǵa Іshki ister mınıstri Matteo Salvınıdi aıyptady. «Salvını óz múddelerin jáne óz partııasynyń múddelerin kózdeıtinin kórsetti. Onyń sheshimderi el úshin aýqymdy qaýip týdyryp otyr», - dedi ol.
Djýzeppe Konte 12 kún buryn koalıtsııany «dármensiz» dep atap, merziminen tys saılaý ótkizý qajettigi týraly aıtqan ІІM basshysynyń is-áreketterin aqylǵa qonymsyz dep málimdedi. «Bul eldi saıası turaqsyzdyqtyń shyrmaýyna jáne qarjylyq turaqsyzdyqqa alyp kelýi múmkin», - dedi ol.
