Italııa Parlamenti otstavkaǵa jiberildi
ASTANA. 23 jeltoqsan. QazAqparat - Italııa Prezıdenti Djordjo Napolıtano ulttyq parlamentti tarqatyp jiberdi, dep habarlaıdy Reuters.
Buǵan negizgi sebep retinde úkimettik daǵdarys ataldy.
«Dál qazir men Parlamentti tarqatý týraly qaýlyǵa qol qoıdym», - dep málimdedi Djordjo Napolıtano saıası partııalar kóshbasshylarymen bolǵan keńesterden keıin jýrnalısterge bergen suhbatynda. Rastalmaǵan málimetter boıynsha, Italııada parlamenttik saılaýlar 2013 jyldyń 24 aqpanyna belgilendi.
Jýyrda prezıdent Italııanyń premer-mınıstri Marıo Montıdiń otstavkaǵa ketý týraly ótinishin qanaǵattandyrdy. Bul, el úkimetin avtomatty túrde otstavkaǵa jiberdi. Bul rette, M.Montıdiń kabıneti óziniń ýákilettigin jańa úkimet jasaqtalǵanǵa deıin júzege asyra beretin bolady.
Premer-mınıstr laýazymy úshin qaıta kúresý nıeti týraly eks-premer jáne «Bostandyq halqy» partııasynyń kóshbasshysy Sılvıo Berlýskonı málimdep te úlgerdi. Ol bul qyzmette úsh márte boldy. Eske salaıyq, Mılan soty S.Berlýskonıdi salyqtyq alaıaqtyǵy úshin bir jylǵa shartty túrde bas bostandyǵynan aıyrǵan bolatyn.
Osylaısha, M.Montıdiń úkimeti bir jyldan sál astam ǵana jumys istedi.
