Italııa Parlamenti depýtattar palatasynyń kvestory «Dostyq» ordenimen nagradtaldy

RIM. QazAqparat – Qazaqstan Elshiliginde Italııa Parlamenti depýtattar palatasynyń Kvestory jáne «Qazaqstan-Italııa» parlamenttik dostyq tobynyń tóraǵasy Edmondo Chırıellıdi memlekettik nagradamyz – II dárejeli «Dostyq» ordenimen marapattaý rásimi ótti, dep habarlaıdy QR SІM baspasóz qyzmeti.

Nagradany Qazaqstan Respýblıkasynyń Prezıdenti Qasym-Jomart Toqaevtyń Jarlyǵyna sáıkes, Qazaqstannyń Italııadaǵy Elshisi Sergeı Nurtaev tabys etti. «Dostyq» ordeni azamattarǵa halyqtar arasyndaǵy beıbitshilikti, dostyqty jáne yntymaqtastyqty nyǵaıtýǵa sińirgen eńbegi úshin beriledi.

Joǵary nagradany tabystaı otyryp, Elshi E. Chırıellıdiń ekijaqty parlamentaralyq yntymaqtastyqty damytýǵa zor úles qosyp otyrǵanyn atap ótti. Onyń tikeleı qoldaýymen Italııa parlamentinde Qazaqstanmen Dostyq toby quryldy, onyń quramyna zań shyǵarýshy organnyń eki palatasynyń da depýtattary kiredi. Parlamenttik top seriktestik qurýdyń mańyzdy quraly retinde qyzmet etedi jáne parlamentaralyq baılanystardy nyǵaıtýǵa kómektesedi. Óziniń qyzmeti barysynda top jetekshisi bizdiń elge birneshe ret kelip, Qazaqstan basshylyǵymen birqatar kezdesýlerge qatysty.

E. Chırıellı tek parlamentaralyq emes, sondaı-aq ekonomıkalyq baılanystardyń odan ári keńeıýine yqpal ete otyryp, Qazaqstan ony árdaıym óziniń senimdi dosy retinde kóre alatyndyǵyn basa aıtty.