Italııa Ortalyq Azııa elderiniń turaqty damýynda senimdi seriktes ekenin dáleldedi – Toqaev

ASTANA. KAZINFORM – Ortalyq Azııa halyqaralyq arenada óz ustanymyn dáıekti túrde nyǵaıtyp keledi. Bul týraly elordada «Ortalyq Azııa – Italııa» sammıtinde Qazaqstan Prezıdenti Qasym-Jomart Toqaev málim etti. 

– Ortalyq Azııa yqylym zamannan beri Shyǵys pen Batys arasynda dáneker bolyp, órkenıetaralyq dıalogty damytýda mańyzdy qyzmet atqarǵan. Búginde bizdiń óńir buryn-sońdy bolmaǵan birliktiń úlgisin tanytyp, tatý kórshilik jáne barshaǵa ortaq progress qaǵıdattaryn berik ustanatynyn kórsetýde. Álemdik arenada jasampaz kún tártibin ilgerilete otyryp, Ortalyq Azııa halyqaralyq qatynastyń yqpaldy sýbektisi retinde óz ustanymyn dáıekti túrde nyǵaıtyp keledi. Bul geosaıası shıelenisterdiń kúsheıýi men jahandyq saýda qarama-qaıshylyqtary aıasynda erekshe mańyzdy, - dedi Qasym-Jomart Toqaev.

Prezıdenttiń aıtýynsha, Italııa damyǵan ekonomıkasy, qýatty ónerkásiptik áleýeti jáne kóptegen salalardaǵy ozyq tehnologııalary bar el retinde jetekshi ındýstrııaaldy derjava sanalady.

– Otyz jyldan astam ýaqyt ishinde Italııa Ortalyq Azııa elderiniń turaqty damýyna tolyq úles qosyp, senimdi seriktes ekenin dáleldedi. «Ortalyq Azııa plıýs» formatyndaǵy bizdiń múmkindikterimizdiń sınergetıkasy óńir memleketteri men Italııa arasyndaǵy ózara tıimdi yntymaqtastyqty keńeıtý úshin qýatty serpin jasaıtynyna senimdimin, - dedi Memleket basshysy.

Budan buryn habarlanǵandaı, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr.

Aıtýly is-sharaǵa qurmetti meımandardan Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp otyr.