Italııa Mılandaǵy tártipsizdikterge baılanysty 500 áskerı qyzmetkerdi jumyldyrmaq
ASTANA. KAZINFORM — Italııa úkimeti Mılandaǵy qaýipsizdikti qamtamasyz etý úshin 500 áskerı qyzmetkerdi jibermek. Mundaı sheshim narazylyq bildirýshiler polıtsııamen qaqtyǵysyp, dúkenderdi tonap, ǵımarattar men ózge de múlikke zııan keltirgen jappaı tártipsizdikterden keıin qabyldandy. Bul týraly Kazinform agenttigi The Guardian basylymyna silteme jasap habarlady.
Áskerılerdi jiberý Mılandaǵy qaýipsizdikti kúsheıtý sharalarynyń bir bóligi bolmaq. Bul máseleni Italııa úkimeti seısenbi kúni qaraıdy. Al qala ortalyǵyndaǵy dúkender ádettegiden erte jabylyp, kásipkerler zorlyq-zombylyq qaıta órshýi múmkin dep qaýiptenip, ǵımarattardyń terezelerin taqtaımen bekitip jatyr.
Chanel, Tiffany jáne Dior sııaqty brendter ornalasqan Mılannyń Vıa Montenapoleone saýda kóshesindegi dúkenderdiń basym bóligi saqtyq sharasy retinde vıtrınalaryndaǵy taýarlardy alyp tastaǵan. Bul ýaqytta polıtsııa kósheni patrýldep, birneshe týrıst bolyp jatqan jaǵdaıdy baqylaǵan.
Aldyńǵy demalys kúnderi Mılannyń ortalyǵynda negizinen qara kıingen, kópshiligi betin jasyrǵan birneshe júz jas vıtrınalardy qıratyp, sýpermarketter men dúkenderdi tonaǵan. Olar qoqys jáshikterin, velosıpedter men kóshe jıhazdaryn tóńkerip, polıtsııa qyzmetkerlerine túrli zat laqtyrǵan.
Zardap shekken nysandardyń qatarynda Carrefour sýpermarketi, Under Armour, Levi’s, Decathlon dúkenderi jáne Rinascente ámbebap dúkeni bar.
Levi’s, Under Armour jáne Decathlon brendteri dúken vıtrınalaryn karton men aǵash panelder arqyly jaýyp tastaǵan.
Kelesi jyly ulttyq saılaý ótetin Italııanyń premer-mınıstri Djordja Melonı zorlyq-zombylyqty aıyptap, dúısenbide mınıstrlermen jáne kúshtik qurylymdar basshylarymen kezdesip, jaǵdaıdy talqylady.
Corriere della Sera gazetiniń habarlaýynsha, Melonı qylmysqa qarsy kúres sharalary aıasynda kámeletke tolmaǵandardy aldyn ala qamaýda ustaý merzimin uzartý, jastar bandalarymen kúresti kúsheıtý jáne parlamentte qaralyp jatqan qaýipsizdik týraly zań jobasynyń keıbir normalaryn qoldanysqa engizý múmkindigin qarastyryp jatyr.
Italııada aldyńǵy aptada ómir súrý qunynyń ósýi men memlekettik qyzmetter sapasynyń nasharlaýyna baılanysty bastalǵan narazylyqtar tonaý men jappaı qıratýǵa ulasqan.
Italııa polıtsııasynyń málimetinshe, jeksenbi kúni Mılandaǵy tártipsizdikter kezinde 271 jas ustalǵan. Olardyń basym bóligi — kámeletke tolmaǵandar.
Demalys kúnderindegi tártipsizdikterden keıin Mılan ortalyǵyndaǵy dúkender men mekemelerge kelgen shyǵyn 700 myń eýrodan asqan. Narazylyq aktsııalary Italııanyń basqa qalalarynda da ótti. Unimpresa bıznes birlestiginiń baǵalaýynsha, el boıynsha jalpy shyǵyn 1,6 mıllıon eýroǵa jetken.
Eske salaıyq, buǵan deıin Frantsııada jappaı tártipsizdikterden keıin keı qalalarda komendanttyq saǵat engiziletinin habarlaǵanbyz.
