Italııa men Túrkııa jaǵalaýynda mıgranttar mingen qaıyq apatqa ushyrady
ASTANA. KAZINFORM – Lampedýza araly mańynda mıgranttar otyrǵan qaıyq tabylyp, keminde 19 adam qaza tapty, taǵy bes adamnyń jaǵdaıy aýyr, dep habarlaıdy Euronews.
Basylymnyń jazýynsha, patrýldik keme halyqaralyq sýlarda, araldan shamamen 160 shaqyrym qashyqtyqta adamdarǵa toly qaıyqty baıqaǵan. Qutqarýshylar jetken kezde borttaǵy 77 adamnyń bir bóligi kóz jumyp úlgergen. Aldyn ala málimet boıynsha, olar gıpotermııadan jáne qaıyq túbinde jınalǵan kómirsýtek býlarynan ýlanǵan.
Lampedýza araly Soltústik Afrıkadan Jerorta teńizi arqyly Eýropaǵa bet alǵan mıgranttar úshin negizgi baǵyttardyń biri bolyp beredi. Bul qaýipti sapar kezinde kóptegen adam kóz jumady. Halyqaralyq kóshi-qon uıymy dereginshe, bıyl jyldyń basynan beri Jerorta teńiziniń ortalyq bóliginde 624 adam qaza tapqan nemese habar-osharsyz ketken. Al ótken jyly bul kórsetkish 1300-den asqan.
Taǵy bir qaıǵyly oqıǵa Egeı teńizi aımaǵynda tirkeldi. Mýgla provıntsııasy jaǵalaýynda úrlemeli qaıyq aýdarylyp, 19 adam qaza tapty. Qaza bolǵandardyń arasynda bala da bar.
Túrkııa jaǵalaý kúzeti málimetinshe, ondaǵan mıgrant mingen qaıyq patrýldiń birneshe ret toqtaý týraly eskertýine baǵynbaı, joǵary jyldamdyqpen qashýǵa tyrysqan. Sonyń saldarynan qaıyq aýdarylyp ketken. Keminde 20 adam qutqarylǵan.
Aımaq gýbernatory Idrıs Akbyıktyń aıtýynsha, barlyq mıgrant Aýǵanstan azamattary bolǵan. Olar Grekııa araldaryna qaraı bet alǵan.
Italııamen qatar, Grekııa da Taıaý Shyǵys, Afrıka jáne Azııa elderindegi qaqtyǵystar men kedeılikten qashqan adamdar úshin Eýropaǵa kiretin negizgi baǵyttardyń biri sanalady. Kóp jaǵdaıda mıgranttar Túrkııa jaǵalaýynan jaqyn mańdaǵy grek araldaryna deıin qysqa, biraq asa qaýipti joldy teńizge jaramsyz shaǵyn qaıyqtarmen júzip ótedi.
Buǵan deıin de naýryz aıynda Italııa jaǵalaýynda zańsyz mıgranttar mingen qaıyq aýdarylǵany habarlanǵan edi.