Italııa men Ispanııa shekaralyq tekserýlerdi toqtatýǵa kelisti
ASTANA. KAZINFORM — Italııa men Ispanııa Seýta ıspan anklavyndaǵy kóshi-qon daǵdarysyna baılanysty engizilgen ózara shekaralyq tekserýlerdi toqtatýǵa kelisti. Mundaı sheshim eki el arasyndaǵy eki aıǵa sozylǵan dıplomatııalyq shıelenisten keıin qabyldandy, dep habarlaıdy Euronews.
Kelisim Italııanyń ishki ister mınıstri Matteo Pıantedozı men Ispanııanyń ishki ister mınıstri Fernando Grande-Marlaskanyń telefon arqyly sóılesýiniń nátıjesinde jasaldy. Buǵan deıin Eýropalyq keńes aıasynda Italııa premer-mınıstri Djordja Melonı men Ispanııa úkimetiniń basshysy Pedro Sanches kezdesken bolatyn.
Italııanyń Іshki ister mınıstrliginiń málimetinshe, jaǵdaıdy talqylaǵannan keıin taraptar qoldanystaǵy shekteýlerdiń merzimin uzartpaý týraly sheshim qabyldaǵan. Shekaralyq tekserýlerdiń ornyna elder Shengen aımaǵyndaǵy qaýipsizdikti qamtamasyz etý úshin aqparat almasýdy kúsheıtpek.
Buǵan deıin Italııa Ispanııadan teńiz porttary men áýejaılar arqyly keletin jolaýshylardy tekserý sharalaryn 7 kúnge uzartqan edi. Ispanııa da jaýap retinde engizgen shekteýlerin saqtap, olardyń merzimi 22 qazanda aıaqtalýǵa tıis bolǵan.
Eki el arasyndaǵy kelispeýshilikke 2026 jylǵy shildede bolǵan kóshi-qon daǵdarysy sebep boldy. Sol kezde myńdaǵan adam Marokkodan Ispanııanyń Seýta anklavyna shekarany zańsyz kesip ótken. Osy oqıǵadan keıin Rım Ispanııadan keletin jolaýshylarǵa qatysty shekaralyq baqylaýdy ýaqytsha qalpyna keltiretinin málimdedi.
1 tamyzdan bastap Italııa bıligi áýejaılar men teńiz porttarynda iriktep tekserý júrgize bastady. Bılik bul sheshimdi ulttyq qaýipsizdikti kúsheıtý jáne yqtımal terrorıstik qaýipterdiń aldyn alý qajettigimen túsindirdi.
Madrıd bul sharalardy qatań synǵa aldy. Ispanııanyń syrtqy ister mınıstri Hose Manýel Albares Italııanyń sheshimin aqylǵa qonymsyz ári masqara dep atady. Keıin Ispanııa da Italııadan keletin jolaýshylarǵa jaýap retinde tekserýler engizdi.
Qol jetkizilgen kelisim eki el arasynda Shengen aımaǵy sheńberinde erkin júrip-turý tártibin qalpyna keltirýge múmkindik beredi.
Aıta keteıik, qyrkúıekte Italııa jáne Ispanııa shekaralyq baqylaýdy 15 kúnge uzartqan bolatyn.
