Italııa men Germanııa shahterleri 15 jyldan artyq jumys istemeıdi – mınıstr

ASTANA. QazAqparat – Eńbek jáne halyqty áleýmettik qorǵaý mınıstri Tamara Dúısenova vedomsvonyń keńeıtilgen alqa májilisinde zııandy jumys oryndarynda eńbek etýshilerdi áleýmettik qorǵaý sharalary týraly aıtty, dep habarlaıdy QazAqparat tilshisi.

«Halyqaralyq tájirıbeni eskere otyryp, áleýmettik áriptesterdiń qaraýyna azamattardyń zııandy eńbek jaǵdaılarynda jumys isteýiniń barynsha kóp kezeńin belgileý jáne saqtandyrý kompanııalarynyń jumyskerlerdiń eńbek jaǵdaılaryn jaqsartýǵa qatysýy jóninde usynystar ázirlenip, shyǵarylady.

Mysaly, Aýstralııa, Italııa jáne Germanııa memleketterinde kómir shahtalarynda jumys isteýdiń maksımaldy kezeńi 15 jyl, metallýrgııa óndirisinde 20 jyl. Álemniń 24 eliniń saqtandyrý kompanııalary jumys berýshilerdiń kásiptik táýekelderdi baǵalaýǵa, qyzmetkerlerdi oqytýǵa, olardyń biliktiligin arttyrýǵa jáne eńbek qaýipsizdigi jónindegi standarttardy ázirleýge jumsaǵan shyǵyndaryn óteıdi. Osy tásilderdi bizde de engizý múmkindigin qarastyrý usynylady», – dedi Tamara Dúısenova.

Sondaı-aq ol eńbek zańnamasynyń saqtalýyn memleket tarapynan baqylaý úshin bızneske jańa retteýshi saıasat engizilýi múmkin ekenin aıtty.

«Bul rette tekserý rásimi profılaktıkalyq sıpatta bolady. Osy maqsatta bıyl «Kásiporyn profaıly» jańa aqparattyq júıesi iske qosylady. Ol zańnamanyń jáne kompanııalardyń ózderi saqtalýyn baqylaýdy júzege asyrýǵa múmkindik beredi», - dedi mınıstr.

Foto: st4.depositphotos.com