Italııa men Frantsııada jappaı narazylyqqa baılanysty qaýipsizdik kúsheıtildi
ASTANA. KAZINFORM — Senbi kúni Rımde 1 500, Mılanda 1 800 tártip saqshysy qaýipsizdikti qamtamasyz etedi. Al Frantsııada jappaı tártipsizdikterdiń aldyn alý úshin 70 myń polıtsııa qyzmetkeri, jandarm men áskerı qyzmetshi jumyldyrylady, dep habarlaıdy Euronews.
24 qazanda, senbi kúni Italııa men Frantsııada ómir súrý qunynyń ósýine qarsy jappaı narazylyq aktsııalary ótedi dep kútilýde. Bılik pen kásipkerler ótken demalys kúnderi bolǵan jappaı qıratýlar men tártipsizdikterdiń qaıtalanýynan qaýiptenip otyr.
Italııada narazylyq aktsııalary Rım, Mılan, Týrın jáne Florentsııany qosa alǵanda, iri qalalarda ótedi dep josparlanǵan.
El astanasynda erekshe qaýipsizdik rejımi engiziledi. Polıtsııa resmı jarııalanǵan sherýlerdi de, ınternette uıymdastyrylyp jatqan ózdiginen ótetin aktsııalardy da baqylaýda ustaý josparyn ázirledi. Tártip saqshylaryna polıtsııa men karabınerlerdiń ushqyshsyz ushý apparattary kómektesedi. Sondaı-aq áleýmettik jelilerdegi jazbalardy qadaǵalaıtyn Rım kıberqaýipsizdik ortalyǵy jumys isteıdi.
Sonymen qatar ınternette narazylyq aktsııalaryna qatysýshylarǵa arnalǵan keńester keńinen taralyp jatyr. Olarǵa ózderimen birge sý, aýyrsynýdy basatyn dáriler men kózden jas aǵyzatyn gazdan qorǵaný úshin sirke sýyn alý usynylýda.
Italııada quqyq qorǵaý organdary qyzmetkerlerine áskerı qyzmetshiler de kómektesedi. Olar úkimettiń qaýipsizdik týraly dekreti qabyldanǵannan keıin osyndaı mindetterdi oryndaýǵa jiberilgen. Qujat narazylyq aktsııalary kezinde zorlyq-zombylyq jasaǵany úshin qylmystyq jaýapkershilik engizedi.
Ótken aptadaǵy tártipsizdikterden keıin polıtsııa uıymdastyrýshylar men arandatýshylardy izdeý maqsatynda júzge jýyq mekenjaıda tintý júrgizdi. Іzdeý júrgizilgen kúdiktilerdiń jartysynan astamy kámeletke tolmaǵandar bolyp shyqty. Olardyń kóbi áleýmettik jelilerde zorlyq-zombylyqqa jáne qylmys jasaýǵa shaqyrǵany úshin jaýapkershilikke tartylǵan.
Frantsııada joǵary daıyndyq rejımi: 70 myń tártip saqshysy
Frantsııada senbi kúngi narazylyq aktsııalary qarsańynda polıtsııa men jandarmerııanyń 70 myń qyzmetkeri jumyldyryldy. Іshki ister mınıstri tártipsizdik uıymdastyrýshylaryna qatysty «barynsha qatań sharalar» qoldanylatynyn málimdedi.
Polıtsııa men jandarmerııa qyzmetkerlerine kóptegen arnaıy bólimshelerdiń qyzmetkerleri men áskerı qyzmetshiler kómektesedi. Olardyń qaramaǵyna tártipsizdikterdi basý úshin ushqyshsyz ushý apparattary men brondy tehnıka berilgen.
Ótken senbide bolǵan oqıǵalardan keıin Frantsııada 2 700 adam ustaldy. Olardyń 217-si qazirdiń ózinde túrmege qamalǵan.
Marsel qalasynda jańa tártipsizdikterdiń aldyn alý úshin barlyq demonstratsııa ótkizýge tyıym salyndy. Qoǵamdyq kólik qozǵalysy toqtatyldy. Qala bıligi qaýipsizdik maqsatynda qala ortalyǵynda kámeletke tolmaǵandarǵa arnalǵan komendanttyq saǵattyń qoldanylý aıasyn keńeıtti.
Aıta ketelik Frantsııadaǵy jappaı tártipsizdik shyǵyny 1,2 mlrd eýroǵa jetýi múmkin.
