Italııa mektepterde býrka men nıkab kııýge tyıym saldy
ASTANA. KAZINFORM – Italııa premer-mınıstri Djordja Melonı basqaratyn úkimet mektepterde býrka men nıkab kııýge tyıym salatyn jańa erejelerdi maquldady, dep habarlaıdy Deutsche Welle.
Qujatta mektepterdegi ıntegratsııany kúsheıtýge baǵyttalǵan birqatar shara qarastyrylǵan. Sonyń ishinde ıtalıan tilin nashar meńgergen, elge jaqynda kelgen sheteldik oqýshylardyń bir synyptaǵy úlesi 30%-dan aspaýǵa tıis. Eger olardyń sany belgilengen mólsherden kóp bolsa, balalar basqa synyptar men mektepterge bólinedi.
Al hıdjab kııýge tyıym salynbaıdy.
– Bul sharalar balalardyń qoǵamǵa jaqsyraq beıimdelýine, barlyq oqýshyǵa teń múmkindik berýge jáne «getto-synyptardyń» qalyptasýyna jol bermeýge baǵyttalǵan, – dedi Djordja Melonı.
Jańa talaptar sheteldik oqýshylardyń ata-analaryna da qatysty. Eger otbasyndaǵy tildik kedergi balanyń oqýyna nemese minez-qulqyna qıyndyq týǵyzsa, ata-analar ıtalıan tiliniń tegin kýrstaryna qatysýǵa mindetti. Kýrstan bas tartqandarǵa 200-den 1000 eýroǵa deıin aıyppul qarastyrylǵan.
Italııada bir synyptaǵy sheteldik oqýshylardyń úlesin 30%-ben shekteý talaby 2010 jyldan beri qoldanylyp keledi. Endi bul normanyń oryndalýyna baqylaý kúsheıtilmek.
Úkimettiń qaýlysy dereý kúshine enedi, alaıda ony 60 kún ishinde parlament maquldaýy qajet. Premer-mınıstr basqaratyn koalıtsııa parlamentte kópshilik orynǵa ıe.
Jańa talaptar elde pikirtalas týǵyzdy. Kásipodaqtar men muǵalimder sheteldik oqýshylar kóp turatyn aýdandarda balalardy ártúrli mektepterge bólý is júzinde qıyndyq týdyrýy múmkin ekenin aıtyp otyr. Pedagogter úkimettiń tildik qoldaýǵa bólgen 14 mln eýrosy jetkiliksiz bolýy múmkin dep esepteıdi.
Buǵan deıin Italııa úkimeti kóshi-qon jáne til saıasatyn qatańdatýǵa baǵyttalǵan birqatar shara qabyldaǵan. 2025 jyldyń qarashasynda Melonı Italııa sottarynyń sheshimderi men Eýropalyq odaq sotynyń ustanymyna qaramastan, zańsyz mıgranttar men baspana suraýshylardy Albanııadaǵy ortalyqtarǵa jiberý jalǵasatynyn málimdegen edi.
Aıta keteıik, shved depýtaty Eýroparlamentte hıdjab kııýge tyıym salýdy usyndy.
