Italııa mafııasynyń Latyn Amerıkasyndaǵy jetekshisi qolǵa tústi

ASTANA. KAZINFORM — Kolýmbııa polıtsııasy Latyn Amerıkasyndaǵy «Ndrangeta» qylmystyq uıymynyń jetekshileriniń biri ıtalıandyq Djýzeppe Palermony tutqyndady, dep habarlaıdy AP. 

Bıliktiń aıtýynsha, ol Ońtústik Amerıkadan Eýropaǵa kokaın men basqa da esirtkilerdiń kontrabandalyq joldaryn baqylaǵan.

Palermo, sonymen qatar Peppe degen atpen belgili, Interpol tarapynan halyqaralyq izdeýge berilgen. Ol Kolýmbııa, Italııa, Ulybrıtanııa jáne Eýropoldyń quqyq qorǵaý organdarynyń birlesken operatsııasy kezinde el astanasy Bogotada, kóshede ustaldy.

Kolýmbııa polıtsııasynyń basshysy Karlos Fernando Trıananyń aıtýynsha, Palermo — shetelde yqpalyn belsendi túrde keńeıtip jatqan, Eýropaǵa kokaın jetkizetin Italııadaǵy eń kúshti jáne jasyryn qylmystyq toptardyń biri «Ndrangeta» mafııasynyń ókili.

Ustalǵan adam Kolýmbııa, Perý jáne Ekvador elderinde iri kólemde esirtki satyp alýmen aınalysyp qana qoımaı, Eýropa naryǵyna esirtki jetkizý úshin teńiz jáne qurlyq joldaryn da baqylaǵan.

BUU málimeti boıynsha, 2023 jyly zańsyz kokaın óndirisi búkil álem boıynsha rekordtyq kórsetkishke jetip, 3708 tonna bolǵan, bul 2022 jylmen salystyrǵanda 34%-ǵa artyq. Bul ósim eń aldymen Kolýmbııadaǵy koka plantatsııalarynyń keńeıýine baılanysty. Sarapshylardyń baǵalaýy boıynsha, jasyryn esirtki naryǵynyń, onyń ishinde kokaın naryǵynyń aınalymy jylyna 500 mıllıard dollardan asady. 

Eske sala keteıik, Brıýsselde esirtki mafııasy qoqan-loqy jasaǵan prokýrorǵa arnaıy kúzet qoıylǵany jaıly jazǵan edik.