Italııa quramasy fýtboldan Álem chempıonatynan tys qaldy
NUR-SULTAN. QazAqparat - Italııa quramasy fýtboldan 2022 jylǵy Álem chempıonatyna beriletin joldamadan qur qaldy, dep habarlaıdy QazAqparat tilshisi.
24 naýryzda fýtboldan Álem chempıonatynyń irikteý satysynda eýropalyq quramalar ótpeli kezeń oıyndaryn ótkizgen edi.
S tobyndaǵy Italııa quramasy óz alańynda Soltústik Makedonııaǵa 0:1 esebimen jol berip qoıdy.
Endi Soltústik Makedonııa fınalda Portýgalııamen sheberlik baıqasady. Jeńgen jaǵdaıda dúbirli dodaǵa joldama alýy múmkin.
Eske salsaq, irikteý satysynda ótpeli kezeń oıyndarynda barlyǵy 12 qurama úsh topqa bólingen.
Árbir topta jartylaı fınal jáne fınaldyq oıyndar belgilengen.
Jartylaı fınalda jeńimpaz atanǵandar fınalda dúbirli dodaǵa beriletin jalǵyz joldamany sarapqa salady.
Osylaısha úsh toptan jeńimpazdar Álem chempıonatyna qatysýǵa múmkindik alady.
A tobynda jartylaı fınalda Shotlandııa men Ýkraına, Ýels pen Avstrııa kezdesýi tıis bolatyn.
Óz alańynda Ýels Avstrııany 2:1 esebimen tize búktirdi.
Ýkraınadaǵy saıası jaǵdaıǵa baılanysty Shotlandııa men Ýkraına oıyny belgisiz merzimge keıinge shegerildi.
Al V tobynda Reseı men Polsha, Shvetsııa men Chehııa sheberlik baıqasýy tıis bolatyn. Shvetsııa men Chehııa kezdesýinde shvetsııalyqtar 1:0 esebimen basym túsip, fınalǵa shyqty.
Ýkraınadaǵy ahýalǵa baılanysty Reseı atalǵan saıystan shettetildi. Polsha birden fınalǵa joldama aldy.
Fınal oıyndary 29 naýryzǵa belgilengen.
