Italııa kınosynyń ańyzy Klaýdııa Kardınale ómirden ótti
ASTANA. KAZINFORM — 23 qyrkúıekte 87 jasynda áıgili ıtalııalyq aktrısa Klaýdııa Kardınale qaıtys boldy. Bul týraly onyń agenti Loran Savrı habarlap, aktrısa Parıj mańyndaǵy úıinde balalarynyń ortasynda kóz jumǵanyn málimdedi, dep habarlaıdy france24.com.
Klaýdııa Kardınale 1938 jyldyń 15 sáýirinde Týnıs mańynda sıtsılııalyq otbasynda dúnıege kelgen. Jastaıynda ol sulýlyq baıqaýynda jeńiske jetip, ákesiniń keńesi boıynsha kınoǵa túse bastaıdy.
Óziniń shyǵarmashylyq jolynda aktrısa 200-den astam fılmde oınady. Ol Federıko Fellınıdiń («8 jarym»), Serdjıo Leoneniń («Bir kezderi Qıyr Batysta»), Anrı Verneıdiń («Ana») jáne basqa da rejısserlerdiń kartınalaryna tústi.
Álemdik kınematografııaǵa qosqan úlesi úshin Kardınale 1993 jyly Venetsııa kınofestıvaliniń «Altyn arystan» júldesin ıelendi. Buǵan deıin, 1984 jyly, ol úzdik áıel róli úshin Pazınettı syılyǵyn alǵan, al 2008 jyly Qurmet legıony ordenimen marapattaldy.
Agentiniń aıtýynsha, Klaýdııa artynda tarıhta máńgi qalatyn myqty, shabyttandyratyn áıel jáne talantty aktrısa beınesin qaldyrdy.
Aıta ketelik jaqynda áıgili modeler Djordjo Armanı dúnıeden ótken edi.