Italııa kemede qutqarylǵan mıgranttardy qabyldaýǵa kelisim berdi
LONDON. VVS – QazAqparat – Jerorta teńizinde 40 kún bolyp, Danııa eliniń kemesine otyrǵyzylǵan mıgranttar tobyna Italııadan túsýge ruqsat etildi, dep habarlaıdy QazAqparat VVS agenttigine silteme jasap.
Arasynda júkti áıel bar 27 mıgrant Lıvııadan 2 tamyz kúni attanǵany atap ótiledi. Mıgranttar otyrǵan qaıyq sýǵa bata bastaǵan soń, olar Danııa eliniń jaqyn mańda júzgen Maersk Etienne tankerine otyrǵyzyldy. Tanker teńizde bir aıdan kóp ýaqyt júzdi. Senbi kúni keshke keme Italııanyń Sıtsılııa jaǵalaýyna toqtaýǵa ruqsat aldy. Sondaı-aq, mıgranttar Mediterranea Saving Humans úkimettik emes uıymy usynǵan qutqarý kemesine otyrǵyzylyp, odan keıin Potstsalo aılaǵyna jiberilgen.
Mediterranea Saving Humans Twitter-degi paraqshasynda bul oqıǵany «eýropalyq teńizde júzý tarıhynda eń uzaq jáne abyroıdan jurdaı etken jaǵdaı boldy» dep sıpattaǵan.
Grekııada bosqyndarǵa arnalǵan Morııa lageri órtengen soń, 12 myńnan astam bosqyn panasyz qalǵany habarlanyp otyr.
Reuters agenttigi byltyr Italııa jaǵalaýyna 5200 mıgrant tússe, bıyl olardyń sany shamamen 19400 adam bolǵanyn atap ótti.
BUU málimetterine sáıkes, Eýropa jaǵalaýyna túsken mıgranttardyń jalpy sany 40 myń adamdy quraǵan, sonyń ishinde 400-den astam adam qaza tapqan nemese iz-tússiz joǵalǵan. Eýropalyq komıssııa bıylǵy jyldyń 30 qyrkúıeginde ımmıgratsııa týraly jańa kelisimdi tanystyrýǵa daıyndalý ústinde.
