Italııa Qazaqstannyń eń iri saýda seriktesteriniń úshtiginde – Premer-Mınıstr

ASTANA. KAZINFORM – Ótken jyly Qazaqstan men Italııa arasyndaǵy ekijaqty taýar aınalymy 20 mlrd dollarǵa jýyqtady. Bul týraly QR Premer-mınıstri Oljas Bektenov Italııa-Qazaqstan jetkizý tizbegi jónindegi halyqaralyq forýmynda aıtty, dep habarlaıdy Kazinform tilshisi.

– Bul forým ótken jyly Prezıdent Q. Toqaevtyń Italııaǵa jasaǵan sapary men sol elde ótken tabysty bıznes-forýmda serpin alǵan strategııalyq áriptestigimizdiń damýyndaǵy mańyzdy kezeń sanalady. Búgingi kezdesýdiń Italııa Premer-mınıstri Djordja Melonıdiń Qazaqstanǵa sapary qarsańynda ótýi de ekijaqty yntymaqtastyqty jańa deńgeıge kóterýge ortaq umtylysymyzdy aıǵaqtaıdy. Bul joǵary deńgeıdegi kezdesý – saýda, ınvestıtsııa jáne ekonomıkalyq yqpaldastyq salalaryndaǵy ortaq basym baǵyttarymyzdy naqty aıqyndap otyr, – dedi Oljas Bektenov forýmnyń ashylýynda.

Premerdiń aıtýynsha, Qazaqstan jahandyq jáne óńirlik jetkizý tizbekteriniń mańyzdy bóligine aınalý úshin ınfraqurylym, logıstıka jáne óndiristik áleýetin belsendi ınvestıtsııalap keledi. 

– Bizdiń elder arasynda ózara qurmetke, senimge jáne turaqty damýǵa negizdelgen tereń baılanys qalyptasqan. Italııa Qazaqstannyń eń iri saýda seriktesteri qatarynda alǵashqy úshtikke kiredi. Bizdiń yntymaqtastyq energetıka, mashına jasaý, hımııa, farmatsevtıka, ınfraqurylym jáne agroónerkásip keshenin qamtıdy, – dedi Premer-Mınıstr. – Ótken jyly ekijaqty taýar aınalymy 25%-ǵa ósip, shamamen 20 mıllıard dollardy qurady. Sonyń ishinde Qazaqstannan eksport kólemi 18 mıllıardtan asqan. Bıylǵy jyldyń birinshi toqsanynda ózara saýda kólemi 4,4 mıllıard dollarǵa jetip, ekonomıkalyq baılanystarymyzdyń berik ekenin kórsetti.

Oljas Bektenov bul kórsetkishter ekijaqty seriktestiktiń myqty irgetasyn bildiretinin, alaıda tolyq áleýet áli tolyq ashylmaǵanyn atap ótti. 

– Qazir Qazaqstan strategııalyq turǵyda jańǵyrý protsesinde: biz shıkizat eksportyna táýeldilikten joǵary qosylǵan quny bar óndiristerge, tehnologııaǵa basymdyq beretin modelge kóship jatyrmyz. Basty maqsatymyz – jańa jetkizý tizbekterin qurý, birlesken kásiporyndar ashý, tehnologııalardy damytý jáne jergilikti óndiristi arttyrý, – dedi Úkimet basshysy.

Forým Qazaqstan men Italııa kompanııalary arasyndaǵy jańa yntymaqtastyq múmkindikterin talqylaıtyn negizgi alańǵa aınalmaq. Qatysýshylar saýda men logıstıka salasyndaǵy yntymaqtastyqty, sonyń ishinde barlyq jetkizý tizbegi boıynsha damytý máselelerin qarastyrady. Kezdesýge «Samuryq-Qazyna», «QazMunaıGaz», Eni, Maire Tecnimont, AnsaldoEnergia sekildi iri uıymdardyń ókilderi qatysyp jatyr. 

Aıta keteıik, sáýir aıynda Italııa Premer-mınıstri Djordja Melonıdiń Qazaqstanǵa resmı sapary josparlanǵan bolatyn. Bul sapar aıasynda «Ortalyq Azııa – Italııa» atty alǵashqy sammıt te ótkizilýi kerek edi. 

Alaıda bul sapar Rım Papasy Frantsısktiń qaıtys bolýyna baılanysty, ıtalııalyq tarap ótinishimen keıinge qaldyryldy.