Italııa Qazaqstan Ulttyq mýzeıinde Restavratsııa ortalyǵyn tegin ashyp berýge daıyn

ASTANA. KAZINFORM — Italııa Qazaqstan Ulttyq mýzeıinde Restavratsııa ortalyǵyn tegin ashyp berýge daıyn. Bul týraly Mádenıet jáne aqparat mınıstri Aıda Balaeva aıtty.

— Prezıdentimizdiń Italııaǵa saparynyń qorytyndysyna oraı birqatara is-shara atqarylyp jatyr. Onyń ishinde eki eldiń mınıstrlikteri birlesken josparymyzdy qurdyq. Sol jospardyń aıasynda kitaptar shyǵarylyp, kontserttik uıymdardyń, teatr ujymdarynyń gastrolderi, mýzeılerdegi kórmeler uıymdastyrylady. Ózderińiz bilesizder, Leonardo da Vınchıdiń kartınasyn ákelip, ulttyq múzeıde kórsettik. Qazirgi basty maqsatymyz — sol qarym-qatynasty nyǵaıtyp, jalǵastyrý. Búginde talqylap jatqan eń negizgi máselemiz — bul Ulttyq mýzeıdiń ishinen úlken Restavratsııa ortalyǵyn jasaý. Mádenı, tarıhı muramyzdy saqtap qalýdyń bir sharty — restavratsııa jumysyn júıeli túrde uıymdastyrý, — dedi mınıstr Aqordada BAQ ókilderine bergen suhbatynda.

Osy oraıda ol maýsym aıynyń basynda Italııaǵa saparlap, onda sol eldegi áriptesimen kezdesetinin, Restavtratsııa ortalyǵyn qurý máselelerin talqylaıtynyn aıtty.

— Kelisim boıynsha ıtalııalyq áriptesterimiz bizge Restavratsııa ortalyǵyn quryp beredi. Tehnologııalaryn, jabdyqtaryn tegin berýge daıyn. Sonymen qatar mamandardy oqytýdy da uıymdastyrady. Ókinishke qaraı bizde restavratsııa jumystaryn jekemenshik uıymdar jasap, barlyq qarajatymyz solarǵa ketedi. Al oblystardaǵy mýzeılerdiń jekemenshik uıymdardyń qyzmetine júginýge múmkindigi joq. Sondyqtan Ulttyq mýzeıdiń ishinde quramyz. Sodan keıin respýblıka deńgeıinde restavratsııa jumystaryn ózimiz atqaramyz, — dedi Aıda Balaeva.

Qazirgi ýaqytta Aqordada Memleket basshysy Qasym-Jomart Toqaev pen Italııa Premer-mınıstri Djordja Melonı joǵary deńgeıde kelissóz júrgizip jatyr.