Italııa Ispanııamen aradaǵy Shengen kelisimin toqtatýǵa daıyn
ASTANA. KAZINFORM — Italııa premer-mınıstri Djordja Melonı Ispanııanyń Soltústik Afrıkadaǵy Seýta avtonomııalyq qalasyna zańsyz mıgranttardyń jappaı kelýine baılanysty Ispanııamen aradaǵy Shengen kelisiminiń qoldanysyn ýaqytsha toqtatýǵa daıyn ekenin málimdedi. Bul týraly TASS agenttigi jazdy.
— Seýtadan taraǵan kadrlar alańdatady. Bul baqylaýsyz zańsyz kóshi-qonnyń Eýropa shekaralarynyń qaýipsizdigine naqty qaýip tóndiretinin taǵy bir márte kórsetti. Biz shekaramyzdy qorǵap, azamattarymyzdyń qaýipsizdigin qamtamasyz etý úshin tótenshe sharalar qabyldaýǵa, onyń ishinde Ispanııamen aradaǵy Shengen aımaǵynyń qoldanysyn ýaqytsha toqtatýǵa daıynbyz, — dep jazdy ol áleýmettik jelidegi paraqshasynda.
Buǵan deıin ıspandyq BAQ sońǵy bir aptada Marokkodan Seýtaǵa 1,5 myńnan astam mıgranttyń teńiz arqyly júzip jetkenin, al keıbiriniń jaıaý kelgenin habarlaǵan. Basqa derekterge sáıkes, avtonomııalyq qalaǵa jetkenderdiń sany 20 myń adamǵa deıin jetýi múmkin. Qazirgi ýaqytta naqty kórsetkish naqtylanyp jatyr.
Kóshi-qon daǵdarysyna baılanysty Ispanııa bıligi Seýtadaǵy qaýipsizdikti qamtamasyz etýge áskerılerdi jumyldyrdy. Sondaı-aq 31 shildede qalaǵa Ispanııa premer-mınıstri Pedro Sanches pen Іshki ister mınıstri Fernando Grande-Marlaska barýy josparlanǵan.
Seýta — Ispanııanyń avtonomııalyq qalasy. Geografııalyq ornalasýyna baılanysty zańsyz kóshi-qon máselesi bul óńir úshin ózekti sanalady. Afrıkadan keletin mıgranttar legin tejeý úshin Marokkomen shekara boıyna tikenekti symmen qorshalǵan bıik qorshaý ornatylǵan.
Italııanyń qazirgi úkimeti zańsyz kóshi-qonmen kúresti óziniń negizgi basymdyqtarynyń biri retinde qarastyrady.
