Italııa Ispanııamen aradaǵy Shengen kelisiminiń qoldanylýyn ýaqytsha toqtatty
ASTANA. KAZINFORM – Italııa Ispanııamen aradaǵy Shengen kelisiminiń qoldanylýyn ýaqytsha toqtatyp, teńiz jáne áýe shekaralaryn japty, dep habarlaıdy Euronews.
Italııa Іshki ister mınıstrligi adamdardyń erkin júrip-turýyn qamtamasyz etetin Shengen kelisiminiń Ispanııaǵa qatysty qoldanylýyn ýaqytsha toqtatý týraly sheshim qabyldap, eki el arasyndaǵy teńiz jáne áýe qatynasyna shekteý engizdi.
Bul sheshim beısenbi kúni keshke Ispanııanyń Seýta anklavyna myńdaǵan zańsyz mıgranttyń kelýinen keıin Premer-mınıstr Djordja Melonı, vıtse-premerler Antonıo Taıanı men Matteo Salvını málimdegen ustanymnyń jalǵasy boldy.
Sheshim juma kúni tańerteń Іshki ister mınıstri Matteo Pıantedozıdiń tóraǵalyǵymen ótken keńeste Kóshi-qon jáne shekara qaýipsizdigin taldaý komıtetiniń baıandamalary negizinde qabyldandy.
Sonymen qatar Frantsııamen shektesetin qurlyqtaǵy Italııa shekarasynda baqylaýdy kúsheıtý týraly sheshim qabyldandy.
Óz kezeginde Frantsııa prezıdenti Emmanýel Makron Ispanııamen aradaǵy qurlyq shekarasyndaǵy baqylaýdy kúsheıtetinin málimdep, Soltústik Afrıka jaǵalaýyndaǵy Seýta anklavyndaǵy tótenshe jaǵdaıdy retteýde Ispanııa bıligine qoldaý kórsetýge daıyn ekenin jetkizdi.
Eske sala keteıik, Ispanııanyń Seýta anklavyna zańsyz ótken shamamen 50 myń mıgranttyń jartysynan kóbi Marokkoǵa qaıtaryldy.
Soǵan qaramastan, zańsyz mıgranttardyń shaǵyn toptary Fnıdek jaǵalaýyndaǵy tolqyn bógetin aınalyp ótý nemese teńiz arqyly júzip ótý arqyly Seýtaǵa jetýdi jalǵastyryp jatyr. Aqparatqa sáıkes, olar Marokkonyń qaýipsizdik kúshteri tarapynan aıtarlyqtaı qarsylyqqa tap bolmaı otyr.
