Italııa Iraktan áskerin tolyq áketti
ASTANA. KAZINFORM – Italııanyń Qorǵanys mınıstrligi ulttyq áskerı kontıngentin Irak aýmaǵynan shyǵarý tolyq aıaqtalǵanyn málimdedi, dep habarlaıdy Kazinform agenttiginiń EO-daǵy menshikti tilshisi.
Italııanyń Qorǵanys mınıstri Gvıdo Krozettonyń habarlaýynsha, áskerı tehnıka men qajetti materıaldyq resýrstardy Iraktan áketýmen aınalysqan sońǵy áskerı qyzmetshiler de elge oralǵan.
Osylaısha Italııa qarýly kúshteriniń Iraktaǵy 12 jylǵa sozylǵan áskerı mıssııasy aıaqtaldy.
Italııalyq áskerı qyzmetshiler «Islam memleketi» terrorlyq uıymyna qarsy júrgizilgen halyqaralyq «Tabandy sheshim» operatsııasyna, sondaı-aq Iraktaǵy NATO-nyń keńes berý mıssııasyna qatysty.
Áskerdi shyǵarý Irak bıligimen kelisilgen 30 qyrkúıektegi merzimnen buryn aıaqtaldy. Áskerı kontıngenttiń basym bóligi naýryz aıynda Irak Kúrdistanyndaǵy bazaǵa jasalǵan dron shabýylynan keıin shyǵaryldy.
— Erteńnen bastap Italııanyń Iraktaǵy áskerı mıssııasy aıaqtalady. Bul –Italııanyń birjaqty sheshimi emes, Baǵdad bıligi jáne seriktes eldermen kelisilgen jańa kezeńge jasalǵan qadam. Endi el qaýipsizdigine tolyq jaýapkershilikti Iraktyń qaýipsizdik kúshteri óz moınyna alady, — dedi Gvıdo Krozetto.
Mınıstr áskerı mıssııanyń aıaqtalýy eki el arasyndaǵy yntymaqtastyqtyń toqtaıtynyn bildirmeıtinin atap ótti. Rım budan bylaı da Baǵdadpen kadr daıarlaý, tájirıbe almasý jáne Irak qarýly kúshteriniń áleýetin arttyrý baǵyttarynda ózara is-qımyldy jalǵastyrmaq.
Sonymen qatar Irakta Eýropa odaǵynyń EUAM Iraq konsýltatıvtik mıssııasy aıasynda qyzmet atqaratyn eki ıtalııalyq karabıner qalady. Atalǵan mıssııa Irak úkimetiniń kelisimimen jumys isteıdi.
Iraktaǵy 12 jyldyq qyzmet kezeńinde Italııanyń myńdaǵan áskerı qyzmetshisi osy elde mindet atqardy.
Buǵan deıin halyqaralyq koalıtsııa Irakqa barlyq bazasy men shtabtaryn tapsyrǵanyn habarlaǵan bolatynbyz.
