Italııa halyqaralyq bitimgershilik mıssııasy aıasynda Gazaǵa ásker jiberýge daıyn

ASTANA. KAZINFORM - Italııanyń Syrtqy ister mınıstri Izraıl men Palestınaǵa bardy. Italııa arab elderiniń basshylyǵymen bitimgershilik mıssııasynyń bóligi retinde Gazaǵa ásker jiberýge daıyn ekeni habarlandy. Bul týraly Italııanyń syrtqy ister mınıstri Antonıo Taıanı Ierýsalımde ızraıldik áriptesi Gıdeon Saarmen birlesken baspasóz máslıhatynda málimdedi, dep habarlaıdy The Times of Israel. 

- Beıbitshilik - Italııa úshin saıası basymdyq. Biz ony yntymaqtastyqpen, ekonomıkalyq kómekpen, sondaı-aq arabtar basqaratyn halyqaralyq bitimgershilik mıssııasy uıymdastyrylsa, Gazaǵa forma kıgen áıelder men er adamdardy jiberý arqyly qoldaý kórsetýge daıynbyz, - dedi Taıanı.

Italııa - Lıvandaǵy UNIFIL mıssııasyna eń kóp ásker qosatyn elderdiń biri, onda 1000-nan astam sarbaz bar.

- Italııa Izraıldi qoldaıdy, sonymen qatar palestınalyqtarmen óte jaqsy qarym-qatynasta. Osy sebepti biz aımaqta mańyzdy ról atqara alatynymyzǵa senimdimiz, - dep atap ótti Taıanı.

Dúısenbi kúni ıtalııalyq dıplomatııanyń basshysy Gaza sektoryndaǵy soǵysty toqtatý kelisimi bastalǵannan keıin Taıaý Shyǵystaǵy beıbitshilikti qoldaý maqsatynda Izraıl men Palestınaǵa bardy.

Sapar aıasynda Taıanı Batys Sherııada Palestına premer-mınıstri Muhammed Mustafamen de kezdesti.