Italııa GMP standarttaryn engizýge yqpal ete alady – sarapshy
ASTANA. KAZINFORM – Farmatsevtıka – Italııadan ımporttalatyn ónimderdiń basym baǵyty: ózara saýdanyń edáýir bóligi dárilik preparattar men medıtsınalyq buıymdarǵa tıesili. Qazirgi Qazaqstan-Italııa baılanysy salaǵa nendeı jańalyq ákeledi?
Ekonomıkalyq zertteýler ınstıtýty Saýda jáne ınvestıtsııalyq saıasatty damytý ortalyǵynyń jetekshi sarapshysy Eskendir Baısbaı taqyrypqa qatysty pikir bildirdi.
2023 jyly Italııadan Qazaqstanǵa jetkizilgen farmatsevtıkalyq ónimniń kólemi 129 199,9 myń AQSh dollaryn qurady, al ótken jyly kórsetkish 156 899,7 myń AQSh dollaryna deıin ulǵaıǵan. Osylaısha, Italııa naryqqa dári-dármek ónimderin jetkizýshi úzdik bes eldiń sanatyna endi.
Eskendir Baısbaıdyń aıtýynsha, buǵan suranys qana emes, densaýlyq saqtaý salasyndaǵy saýda-ekonomıkalyq is-qımyl áser etýde.
– Ónimder tikeleı jetkizý arqyly da, birlesken ınvestıtsııalyq jobalar aıasynda da kelip jatyr. Mysaly, Almaty oblysynda ınvestıtsııalyq quny 58,8 mln AQSh dollaryna teń farmatsevtıkalyq zaýyt salý jobasy iske asyrylýda. Ol ishki naryq pen eksport úshin qatty nysanda dári-dármek shyǵaratyn bolady. Budan basqa, farmatsevtıkalyq ónimderdi óndirý úshin agrarlyq shıkizatty qaıta óńdeý jónindegi ıtalıandyq UCI uıymymen birlesken joba talqy ústinde, – deıdi E.Baısbaı.
Onyń sózinshe, farmatsevtıka salasyndaǵy seriktestik ekonomıkany ártaraptandyrýǵa múmkindik beredi. Importqa táýeldilikti tómendetýge, zamanaýı dárilik zattardy qoljetimdi etýge kómegi kóp. Bastysy, tájirıbe almasýdy qalys qaldyrmaý kerek.
– Eldegi beıindi ınstıtýttardyń ıtalıandyq ýnıversıtettermen baılanys ornatýy ózekti. Bizge medıtsınalyq ortalyqtar arasyndaǵy tájirıbe almasý, kadrlar daıarlaý yntymaqtastyq aýadaı qajet. Investıtsııalar men tehnologııalar durys ıntegratsııalansa, jergilikti óndiris bazasyn qurýǵa qol jeter edi, – deıdi sarapshy.
Eskendir Baısbaıdyń pikirinshe, Italııa Qazaqstanǵa GMP standarttaryn engizýge yqpal etýi ǵajap emes.
– Italııa GMP (Good Manufacturing Practice) standarttaryn engizýge yqpal ete alady. Bul otandyq preparattardyń sapasyn jaqsartyp, olardyń ishki naryqta ǵana emes, eksporttaǵy básekege qabilettin arttyrady, – deıdi ol.
Osyǵan deıin Qazaqstan men Italııa isker toptardyń baılanysyn nyǵaıtatyny týraly jazdyq.