Italııa genderlik sebeppen áıel óltirýdi jeke qylmys retinde bekitti

ASTANA.KAZINFORM — Italııa Parlamenti qylmystyń jekelegen sanaty — áıeldi genderlik sebeptermen óltirý — fermıtsıd boıynsha qylmystyq zańnamaǵa túzetý engizdi, dep habarlaıdy Kazinform agenttigi.

Italııa femıtsıdti resmı túrde ulttyq qylmystyq kodeksine jeke qylmys retinde engizdi, oǵan ómir boıy bas bostandyǵynan aıyrý jazasynyń eń joǵary mólsheri kózdelgen.

Zań prezıdent qol qoıǵannan keıin kúshine endi, bul Eýropadaǵy áıelder quqyqtary salasyndaǵy eń kóp talqylanǵan reformalardyń birine aınaldy.

Bul bastamany Premer-mınıstr Djordja Melonı basqaratyn úkimet usyndy. Ol zań jobasynyń 2025 jyldyń 7 naýryzynda Mınıstrler Keńesiniń otyrysynan keıin qabyldanǵanyn jarııalap, áıelderge qatysty zorlyq-zombylyqqa júıeli túrde jaýap berý qajettiligin atap ótti.

Reformaǵa birqatar kisi óltirý sebepteri túrtki boldy, bul jappaı qoǵamdyq narazylyq týdyryp, jaza túrin kúsheıtýdi talap etti. Sońǵy jyldary Non Una di Meno sııaqty belsendi qozǵalystar júıeli ózgeristerge jáne turmystyq jáne genderlik zorlyq-zombylyq qurbandaryn tıimdi qorǵaý tetikterin jasaýǵa shaqyrdy.

BUU Esirtki jáne qylmys jónindegi basqarmasynyń jahandyq zertteýine sáıkes, 2023 jyly óltirilgen áıelderdiń shamamen 60%-y jaqyn seriktesteriniń nemese basqa otbasy músheleriniń qolynan qaza tapqan. Esepte sondaı-aq «óz úıi áıelder men qyzdar úshin eń qaýipti oryn» ekeni aıtylǵan, bul femıtsıdterdiń aıtarlyqtaı bóligi otbasynda bolatynyn kórsetedi.

Buǵan deıin Qyrǵyzstan turmystyq zorlyq-zombylyqqa qarsy kúres sharalaryn kúsheıtip jatqany týraly habarlanǵan bolatyn.

Sondaı-aq, biz Qazaqstandaǵy turmystyq kisi óltirý sanynyń úshten birge azaıǵanyn habarladyq.