Italııa Call of Duty jáne Diablo oıyndaryn shyǵaratyn kompanııany tergemek
ASTANA. KAZINFORM — Italııanyń monopolııaǵa qarsy is-qımyl organdary Activision Blizzard kompanııasyna qatysty tergep-tekserý amaldaryn bastady. Call of Duty Mobile jáne Diablo Immortal oıyndaryndaǵy monetızatsııalaý tájirıbesine qatysty kúdik týyndaǵan. Basty nazar kámeletke tolmaǵandardyń shyǵyndaryna áser etýi múmkin olja qoraptaryna, vırtýaldy valıýtalarǵa jáne basqa da satyp alý tetikterine aýdarylyp otyr, dep habarlaıdy Euronews.
Vedomstvo oıyn shyǵarýshy kompanııany «EO tutynýshylardy qorǵaý erejelerin buzýy múmkin be?» degen suraq boıynsha tergep jatyr. Tergeý Norvegııa men Danııadaǵy tutynýshy quqyǵyn qorǵaý organdarynyń qoldaýymen júrgizilip jatyr.
Retteýshi organ aqshaǵa satyp alynatyn vırtýaldy valıýtalardy paıdalaný tetikterine erekshe nazar aýdaryp otyr. Italııa bıliginiń pikirinshe, mundaı júıe oıyn ishinde satyp alynatyn ónimderdiń qunyn túsinýdi balalar úshin qıyndatýy múmkin.
Eger tutynýshylardy qorǵaý týraly zańdardyń buzylýy anyqtalsa, Activision Blizzard kompanııasyna árbir zardap shekken elde jyldyq aınalymynyń 4%-yna deıin aıyppul salynýy múmkin.
Tergeý oıyn ındýstrııasyndaǵy tutynýshylardy qorǵaý boıynsha EO-nyń keń aýqymdy naýqanynyń bóligi bolyp tabylady. Naýqan aıasynda Riot Games, Supercell, Ubisoft, Mojang sekildi oıyn shyǵaratyn toǵyz kompanııa da tekseriledi.
Buǵan deıin Italııada týrısterge arnalǵan at-arbalarǵa tyıym salynatyny habarlanǵan bolatyn.
