Italııa bankter men oıyn bıznesine salynatyn salyqty kóteredi
ASTANA. KAZINFORM — Italııa 2027 jylǵy memlekettik bıýdjetti qarjylandyrý úshin bankterge, saqtandyrý kompanııalaryna, energetıkalyq kompanııalarǵa jáne oıyn bıznesine salynatyn salyqty kóteredi. Bul týraly Reuters agenttigi jazdy.
Ekonomıkaǵa serpilis berýge arnalǵan paket kelesi jyly Eýropa Odaǵynyń úshinshi iri ekonomıkasynyń bıýdjet tapshylyǵyn jalpy ishki ónimniń 3,4%-yna deıin arttyrady, bul EO belgilegen 3% sheginen aıtarlyqtaı joǵary, al 2026 jyly bul kórsetkish 2,9% shamasynda bolmaq.
Italııa premer-mınıstri Djordja Melonıdiń aıtýynsha, bıýdjette salyq jeńildikteri men jalpy somasy 26 mıllıard eýrony quraıtyn qosymsha shyǵyndar kózdelip otyr. Bul sharalar tabysy ortasha azamattar men ózin-ózi jumyspen qamtyǵandarǵa salynatyn salyq aýyrtpalyǵyn azaıtýǵa, sondaı-aq ulttyq densaýlyq saqtaý júıesin qarjylandyrýdy arttyrýǵa baǵyttalǵan.
Qarjy kompanııalary bul sharalarǵa 5 mıllıard eýrodan astam qarajat bóledi. Energetıka jáne oıyn bıznesi 700 mıllıon eýrodan úles qosady. Bankter úshin korporatıvtik salyq mólsherlemesi 27,5%-dan 30,5%-ǵa deıin, al saqtandyrý kompanııalary úshin 24%-dan 27%-ǵa deıin artady. Salyq jeńildikterin azaıtý arqyly qosymsha kirister de alynady dep kútiledi.
Sonymen qatar, bıýdjet josparynda tabysy ortasha azamattarǵa salynatyn salyq aýyrtpalyǵyn azaıtý kózdelgen. Jyldyq tabysy 55 000 eýrodan aspaıtyndar úshin tabys salyǵy 33% bolady, qazir bul soma 50 myń eýro. Premer-mınıstr Djordja Melonıdiń aıtýynsha, salyq tóleýshiler úshin eń kóp únem jylyna shamamen 500 eýroǵa jetedi.
Ózin-ózi jumyspen qamtyǵandar úshin 15 paıyzdyq salyq salynatyn jyldyq tabystyń shegi 85 000 eýrodan 100 000 eýroǵa deıin artady.
Aıta keteıik, Grýzııa oıyn bıznesi úshin salyqty jeńildetý jaǵyn qarastyryp jatyr.
