Italııa Aýǵanstandaǵy ahýal boıynsha G20-nyń kezekten tys sammıtin ótkizýdi josparlap otyr

NUR-SULTAN. QazAqparat – Italııanyń Premer-mınıstri Marıo Dragı Aýǵanstandaǵy ahýal boıynsha álemniń jetekshi ekonomıkalaryn biriktiretin G20 sammıtin uıymdastyrý boıynsha jumys júrgizip jatyr.

Bul týraly beısenbi kúni eldegi eki jalpyulttyq gazet jazdy, dep habarlaıdy QazAqparat tilshisi.

Italııa bıyl G20 sammıtine tóraǵalyq etedi jáne kezdesý qazan aıyna josparlanǵan Rımdegi sammıtten buryn ótýi múmkin, dep jazady Reuters la Repubblica gazetine silteme jasap.

Kelesi aptada G7 toby kóshbasshylarynyń Aýǵanstandaǵy jaǵdaıǵa baılanysty jalpy strategııa men kózqarastardy talqylaý úshin onlaın-kezdesýi josparlanǵan.

Eske salsaq, keshe BUU-nyń Aýǵanstanǵa járdem kórsetetin uıymdary Almatyǵa ýaqytsha ornalastyrylatyny habarlandy.

Aýǵanstandaǵy ishki saıası ahýaldyń shıelenisýine baılanysty Birikken Ulttar Uıymy (BUU) óziniń Aýǵanstanǵa járdem kórsetý jónindegi mıssııasyn (UNAMA) jáne AIR-da akkredıttelgen BUU-nyń basqa da agenttikterin Almaty qalasyna ýaqytsha ornalastyrý týraly Qazaqstanǵa ótinish bildirdi.

Qazaqstan men BUU-nyń jan-jaqty ózara is-qımyly rýhy sheńberinde jáne osy uıymnyń tolyq quqyqty múshesi retindegi mindettemeleri aıasynda Prezıdent Qasym-Jomart Toqaev BUU ótinishin qoldaý týraly sheshim qabyldady.