Italııa áýejaıynda Eýropadaǵy eń úlken kún elektr stantsııasy ornatylǵan

ASTANA. KAZINFORM – Stantsııa Rım-Fıýmıchıno áýejaıynyń jumysynan shyǵarylatyn kómirqyshqyl gazyn jyl saıyn 11 myń tonnadan astamǵa azaıtady, dep habarlaıdy Euronews.

Áýejaı – áýe tasymaldaryn júzege asyrý jáne qyzmet kórsetýge arnalǵan keshen ǵana emes. Italııada dáleldegendeı, áýe aılaqtary kún batareıalaryn ornatý úshin tamasha oryn bola alady.

Jaqynda Rım-Fıýımıchıno halyqaralyq áýejaıy óziniń jańa kún fermasyn tanystyrdy. Ol №3 ushý-qoný jolaǵynyń shyǵys bóligi boıynda ornalasqan. Elý bes myń panel Eýropadaǵy eń úlken fotoelektrlik júıeni quraıdy.

Stantsııa Italııanyń energetıka mınıstriniń qatysýymen ashyldy. Osy jobanyń arqasynda áýejaı jumysy barysynda shyǵarylatyn kómirqyshqyl gazy jyl saıyn 11 myń tonnadan astamǵa azaıady.

- Bul zaýyt kómirtegi beıtaraptyǵyna qalaı qol jetkizýge bolatynyn jáne dekarbonızatsııaǵa qurbandyqtar arqyly emes, kerisinshe, zamanaýı jáne kómirtekti-beıtarap óndiris arqyly qalaı qol jetkizýge bolatynyn kórsetedi, - dedi Italııanyń energetıka mınıstri Djılberto Pıketto-Fratın.

Uqsas jobalardy júzege asyrý úshin áýejaılardan basqa kóptegen aımaqty paıdalanýǵa bolady.

Avıatsııa kólik sektoryndaǵy parnıktik gazdar shyǵaryndylarynyń ekinshi úlken kózi bolyp sanalady. Jańartylatyn energııa jobalary úshin óz aýmaqtaryn paıdalaný arqyly áýejaılar qazba otyndaryna táýeldilikti azaıtýda jáne jasyl kóshýge úles qosýda mańyzdy ról atqara alady.

Buǵan deıin Qytaı ınvestıtsııasyna salynatyn jel men kún elektr stansalarynyń tarıfi jarııalanǵanyn jazǵan bolatynbyz.