Italııa aptap ystyqqa baılanysty dabyldyń qyzyl dárejesin engizdi

ASTANA. QazAqparat – Italııanyń 16 qalasynda aptap ystyqqa baılanysty dabyldyń qyzyl dárejesi engizildi, bılik ókilderi qaýipsizdik sharalaryn saqtaýǵa shaqyrdy, dep habarlaıdy QazAqparat Euronews agenttigine silteme jasap.

Adamdarǵa kúndiz tike túsetin kún sáýlesinen saqtanýǵa jáne qarııalarǵa muqııat kóńil bólýge keńes berdi.

Haıýanattar baǵynda janýarlarǵa muzdatylǵan taǵam berip, shomylýǵa kóbirek ýaqyt bólip jatyr.

«Sizder bul ystyqtan fızıkalyq turǵyda zardap shegip otyrsyzdar. Sonymen qatar bul ystyq burynǵydaı birneshe kúnnen keıin aıaqtalmaıdy, bir aıdan asa bolady. Biz zardabyn sezip otyrmyz», - deıdi ıtalııalyq qarııa.

Al Greta Týnberg eskertkenin aıtty. Shved ekobelsendisi aptap ystyqta saıasatkerlerden áreketke kóshý úshin taǵy qandaı dálel kerek ekenin surady.

Sol aralyqta Ispanııanyń Palma aralynda jylý tolqyny saldarynan orman órti tarady. 500-ge jýyq turǵyn evakýatsııalandy, bılik ókilderi áli de myńnan asa adamdy evakýatsııalaý qajet bolýy yqtımal ekenin málimdedi.