Italııa adam saýdasy úshin jazany qataıtpaq

RIM. QazAqparat - Italııa qul saýdagerlerine qatysty jazany kúsheıtpek. Aqpan aıynyń sońynda 70-ten astam mıgranttyń ómirin qıǵan qaıǵyly oqıǵadan keıin osy aptada Italııa premer-mınıstri Djordjııa Melonı adam saýdasy úshin jazany barynsha qataıtýdy usyndy, dep habarlaıdy QazAqparat ANSA agenttigine silteme jasap.

El úkimeti Melonıdiń usynysyn maquldady. Oǵan sáıkes, endi mıgranttardyń ólimi men aýyr jaraqatyna kináli adam saýdagerleri 30 jylǵa bas bostandyǵynan aıyrylýy múmkin.

BBC News habarlaýynsha, mınıstrler kabıneti Italııaǵa keletin sheteldik jumysshylar úshin zańdy joldardy qurý sharalary týraly da kelisti.

Mınıstrler kabınetiniń otyrysynda premer-mınıstr Melonı Italııanyń adam saýdagerlerine tek eldiń ózinde ǵana emes, úshinshi elderge saparlar uıymdastyratyndarǵa da qarsy áreket etetinin basa aıtty.

Aıta keteıik, aqpan aıynda Italııany dúr silkindirgen apatqa baılanysty mınıstrler kabıneti men Melonıdiń ózi qatań synǵa ushyrady.

Ol kezde aǵash qaıyqta bolǵan adamdardyń kópshiligi - barlyǵy 200 adam - Aýǵanstan, Pákistan, Somalı, Sırııa, Irak jáne Irannan kelgender ekeni aıtylady.

Keme qolaısyz aýa raıynda Krotone mańyndaǵy jartastarǵa soǵylyp, sýǵa batyp ketti.

Resmı málimet boıynsha, 72 adamnyń denesi tabyldy, taǵy 79 adam aman qaldy, 30-ǵa jýyq adam iz-túzsiz joǵalyp ketken.