Italııa 4 mamyrdan bastap karantın rejımin jeńildetpek
RIM. QazAqparat – Seısenbi kúni Italııanyń Premer-Mınıstri Djýzeppe Konte Úkimettiń karantın rejımin aıtarlyqtaı jeńildetý jónindegi jospar boıynsha jumys istep jatqandyǵyn málim etti. Oǵan sáıkes, shekteý sharalary 4 mamyrdan aıaqtalady.
Bul týraly QazAqparat Italııanyń ANSA agenttigine silteme jasap habarlaıdy.
«Osy aptanyń sońyna deıin men bul jospardan sizderdi habardar etip, naqty qurylǵan baǵdarlamany búge-shigesine deıin tanystyra alam degen oıdamyn»,-dep habarlady Konte óziniń Facebook-paraqshasynda.
Premer-Mınıstriń pikirinshe, el azamattarynyń basym kópshiligi karantınnen sharshady jáne olar shekteý sharalarynyń qysqartylǵanyn, tipti múldem alynyp tastalǵanyn qalaıdy.
«Ol úshin bólshek saýda kompanııalary men mekemeleri tezirek jumysyn bastaýy kerek. Meniń de «bárin birde ashaıyq» dep aıtqym keledi. Birden. Biraq bul jaýapsyzdyq bolar edi. Bunyń sońǵy vırýstyń órshýine ákelip soǵatyn edi. Sóıtip, ol osy ýaqytqa deıin istegen isterimizdiń tıimdiligin nátıjesin joqqy shyǵarar edi», - dep atap ótti Premer-mınıstr.
«Sonymen qatar Konte aımaqtyq erekshelikteri eskerile otyryp, ulttyq jospar jasalatynyn aıtty».
Onyń aıtýynsha, qarbalas kezinde halyqty qozǵalysty shekteýge shaqyryp, tipti «balama transport túrine basymdyq berilýi kerek».
Eske sala ketsek, memleket bıligi naýryzdyń basynda karantın engizdi. Shekteý sharalary 4 sáýirde alynady dep josparlanǵan bolatyn, alaıda, karantın sharalary áli de jalǵasýda.
Sońǵy málimetter boıynsha, Italııa koronavırýs juqtyrǵandar sany boıynsha álemde úshinshi orynda tur. Elde KVI juqtyrǵan 181 22 adam tirkeldi, olardyń 24 144-i qaıtys bolyp, 48 877 azamat emdelip shyqty.
ANSA aqparat agenttiginiń habarlaýynsha, Italııada COVID-19 koronavırýsynyń qaýipti shtammyn juqtyrǵan 141 dáriger ómirden ótken.
