Italııa 25 jylda Qazaqstan ekonomıkasyna 6 mlrd dollar ınvestıtsııa quıdy
ASTANA. QazAqparat - Qazaqstan men Italııa Respýblıkalary arasynda dıplomatııalyq qarym-qatynastar ornatylǵan 25 jylda el ekonomıkasyna tartylǵan ıtalııalyq ınvestıtsııalardyń jalpy kólemi 6 mlrd.-qa jýyq AQSh dollaryn qurady, dep habarlaıdy QazAqparat QR Syrtqy ister mınıstrligine silteme jasap.
21 tamyzda Qazaqstan Respýblıkasy men Italııa Respýblıkasy arasyndaǵy dıplomatııalyq qarym-qatynastardyń ornaǵanyna 25 jyl toldy.
Shırek ǵasyr ishinde elderimiz arasynda syndarly saıası dıalog ornatylyp, tyǵyz sharttyq-quqyqtyq baza quryldy, saýda-ekonomıkalyq jáne mádenı-gýmanıtarlyq salalardaǵy yntymaqtastyq qarqyndy damydy.
2009 jyly qol qoıylǵan Strategııalyq áriptestik týraly memleketaralyq shart Qazaqstan-Italııa qarym-qatynastarynyń erekshe mártebesin aıǵaqtaıtyn asa eleýli oqıǵa boldy.
BUU, EQYU jáne basqa da halyqaralyq uıymdar sheńberinde senimdi qarym-qatynastar ornatyldy. Qazaqstan men Italııanyń halyqaralyq kún tártibindegi ózekti máseleler boıynsha ustanymdary uqsas. Eki eldiń
2017 jyly BUU Qaýipsizdik Keńesi aıasyndaǵy ózara is-qımylynda bir-birine demeýi osynyń dáleli.
Italııa Qazaqstannyń negizgi syrtqy saýda áriptesteriniń biri bolyp tabylady, ıtalııalyq kompanııalar elimiz ekonomıkasyndaǵy iri ınvestorlardyń qatarynda. Osy jyldar ishinde Qazaqstan ekonomıkasyna tartylǵan ıtalııalyq ınvestıtsııalardyń jalpy kólemi shamamen 6 mlrd. AQSh dollaryn qurady.
Ónerkásiptik jáne ekonomıkalyq yntymaqtastyq jáne almasý jónindegi úkimetaralyq jumys tobynyń belsendi qyzmeti ekonomıkalyq jáne ınvestıtsııalyq ózara árekettestikti barynsha keńeıtýge yqpal etýde.
Italııanyń jańartylatyn energııa kózderin qoldanýdaǵy baı tájirıbesin nazarǵa ala otyryp, ıtalıan kompanııalary Astanadaǵy EKSPO-2017 halyqaralyq mamandandyrylǵan kórmesine belsendi qatysýda.
Óńiraralyq yntymaqtastyq serpindi damýda. Astana men Mılan, Astana men Frıýlı-Venetsııa-Djýlııa óńiri delegatsııalarmen turaqty túrde almasýda. Bul yntymaqtastyqqa Qazaqstannyń Italııanyń birqatar qalalaryndaǵy qurmetti konsýldary zor úles qosyp otyr.
Bilim jáne mádenıet salasyndaǵy baılanystar da keńeıip keledi. 2013 jyly Italııada Qazaqstannyń mádenıet kúnderi, al 2016 jyly Qazaqstanda Italııanyń mádenıet kúnderi sátti ótti. «Astana Opera» teatry Mılandaǵy «La Skala», Neapoldegi «San Karlo» jáne Genýıadaǵy «Karlo Felıche» teatrlarymen tyǵyz yntymaqtastyqta.
Qazaqstan Italııamen strategııalyq áriptestikti jan-jaqty nyǵaıtyp, damytýǵa nıetti.
