Italııa 1950 jyldan beri bolmaǵan aptap ystyqty bastan ótkerdi

Bul týraly Italııa Ulttyq zertteý keńesiniń Bıoekonomıka ınstıtýty (CNR-IBE) málimdedi. Aýa temperatýrasy eldiń búkil aýmaǵynda, sonyń ishinde taýly óńirlerde de jer betinen eki metr bıiktikte ólshengen.

Tamyz aıy eń ystyq aı bolyp shyqty, ortasha temperatýra 25,6°C-qa jetti. Bul – 1951-1980 jyldardaǵy kórsetkishten 5,2 °C-qa, al 1991-2020 jyldardyń normasynan 3,5 °C-qa joǵary.

Sondaı-aq tamyz aıynyń buǵan deıingi rekordy da (2024 jylǵy 24,6 °C jáne 2017 jylǵy 24,0 °C) jańartyldy.

Italııa tarıhynda alǵash ret shilde men tamyz qatarynan eń jyly aı atandy. Al 2026 jylǵy kóktemniń ortasha temperatýrasy 12,1 °C-qa jetip, 2024 jylǵy rekordtyq kórsetkishti qaıtalady.

CNR-IBE ınstıtýtynyń zertteýshisi Lorentso Archıdıakonyń aıtýynsha, qazirgi kórsetkishter 2026 jyl Italııadaǵy 1950 jyldan bergi eń jyly maýsym bolýy múmkin ekenin ańǵartady. Qańtardan tamyzǵa deıingi aralyqta ár aıdyń temperatýrasy ótken jyldyń sáıkes kezeńindegi kórsetkishten joǵary boldy.

Meteoderekterdiń jeke taldaýy maýsym-tamyz aılarynda Rım, Florentsııa jáne Týrınde aptap ystyq birneshe ret bolǵanyn kórsetti. Bul qalalarda joǵary temperatýra keminde alty kún qatarynan saqtalǵan.

Sarapshylardyń baǵalaýynsha, bıylǵy aptap ystyq EO ekonomıkasyna 180 mıllıard eýro shyǵyn ákelýi múmkin. Bul kórsetkish EO-nyń jalpy ishki óniminiń shamamen 1%-yna teń jáne 2026 jylǵa boljanǵan ekonomıkalyq ósimmen shamalas.

Italııadaǵy bul rekord – bıylǵy Eýropadaǵy jalpy ahýaldyń bir bóligi. Ulttyq meteorologııalyq qyzmetterdiń málimetinshe, Ulybrıtanııa, Frantsııa jáne Belgııa da baqylaý tarıhynda buryn-sońdy bolmaǵan birneshe aptap ystyqty bastan ótkerdi.

Eske sala keteıik, buǵan deıin Frantsııadaǵy aptap ystyqtan mektepterde sabaq ýaqytsha toqtatylǵanyn habarlaǵan edik.