Italıandyqtar «Balqadısha» ánin álemdik hıtke aınaldyrmaqshy
ASTANA. QazAqparat - Italıandyq ınjener Tonı Týrı men áıgili shoýmen Alfonso Zambrano Aqan seriniń «Balqadısha» ánin ıtalıan tiline aýdaryp, sol ánge óz elderinde beınebaıan túsirdi.
Qazir olar jańa joba boıynsha Qazaqstanda jumys jasaýda. «Biz mádenıet, sán jáne týrızm salasynda eki el arasynda tyǵyz baılanys ornatqymyz keledi», - deıdi Zambrano. Joba sheńberindegi alǵashqy shara sáýirdiń 4-i men 5-i kúnderi Atyraý qalasynda ótedi. Onda áıgili ıtalıan ánshisi, kóptegen halyqaralyq baıqaýlardyń jeńimpazy Gýerıno Papa kontsert beredi. Bul kontsertte Tonı Týrı ıtalıan tilinde «Balqadıshany» oryndaıdy. Onyń sózine qaraǵanda, «Balqadıshany» jazyp jatqanda bul án ıtalıandyqtarǵa óte qatty unaǵan. Olar Aqan Seriniń áni álemdik hıtke aınalýy múmkin dep baǵa bergen. Odan basqa, joba sheńberinde ıtalıandyq irimshik daıyndaýshylar Atyraýda sheberlik synybyn ótkizedi. Osylaısha olar jergilikti halyqty motsarella daıyndaýǵa úıretpekshi, dep jazady «Aq Jaıyq» gazeti.
