KZ QZ RÝ EN 中文 ق ز ЎZ
    Trend:
    Jibek Joly TRK
    QZ
    Trend:

    Italıandyqtar «Astana Opera» ónerin joǵary baǵalady

    ASTANA. QazAqparat - Italııadaǵy «Astana Operanyń» Gala baleti demde óte shyqty. Elordalyq teatrdyń «Karlo Felıchedegi» gastroliniń úshinshi kúninde ıne shanshyr jer bolǵan joq. Bul týraly «Astana Opera» teatrynyń baspasóz qyzmeti habarlady.

    Italıandyqtar «Astana Opera» ónerin joǵary baǵalady

    Áleýmet ártister bılegen kezde olardyń tehnıkalyq deńgeıine ǵana emes, sondaı-aq akterlyq sheberligine, ulttyq erekshelikke tańdaı qaqty. Klassıkalyq nomerlermen qatar Galada, K. Kúmisbekovtiń mýzykasyna qoıylǵan Ǵ. Bóribaevanyń horeografııasyndaǵy «Bıshi qaıyń» jáne N. A. Tilendıevtiń mýzykasyna qoıylǵan Z. Raıbaevtyń horeografııasyndaǵy «Ata tolǵaýy» bıleri bar. Italıandyq kórermen ózderi úshin tańsyq qazaq bıleriniń oryndalýyn úlken qyzyǵýshylyqpen qadaǵalap, jarqyraǵan kostıýmderge kóz toıdyrýmen boldy.

    Jas ártister - halyqaralyq konkýrstardyń laýreattary Áıgerim Beketaeva men Erkin Rahmetollaev «Aqqý kóli» baletindegi nomerlerin tamasha oryndap shyqty. V. Vaınonenniń horeografııasyndaǵy «Jańǵaq shaqqysh» baletinen adajıo usynǵan QR eńbek sińirgen qaıratkeri Taıyr Gataýov pen Nazerke Aımuhamedovaǵa kórermen kópke deıin qoshemet kórsetip, jibermedi. V. Solovev-Sedoıdyń «Taras Býlba» baletinen Gopak oryndaǵan Erkin Rahmetollaev, Arman Orazov, Serik Naqyspekov pen Eldar Sársembaev áleýmetke erekshe jalyn, kóńil kúı syılady. A. Adannyń «Jızel» baletinen Pas de deux oryndap shyqqan QR eńbek sińirgen qaıratkeri Gaýhar Ýsına men halyqaralyq konkýrstardyń laýreaty Dosjan Tabyldy kórermenniń ystyq yqylasyna bólendi.

    Gala balettiń baǵdarlamasyn «Qypshaqtar bıi» - A. Borodınniń «Igor knıaz» operasynan kórinis aıaqtady. Trýppa baryn salyp bıledi. Solıster birneshe márte taǵzym etip, gúlin jaýdyrǵan kópshiliktiń ár nomer saıyn shapalaǵy tolastaǵan joq. Kontsertten keıin olar qoltańbalaryn taratyp, baspasóz ókilderimen júzdesip jatty.

    Tańdanysyn jasyrmaǵan ıtalıandyq Paolo Marıno esimdi kórermen «Astana Opera» trýppasynyń sapary Genýıa qalasy úshin shynymen de mańyzdy oqıǵa ekenin atap ótti.- «Biz búgin kásibı turǵyda shyńdalǵan ujymdy tamashaladyq dep esepteımin, qazir biz kóbine moderndi tamashalaıtyndyqtan, bul bizde sırek qoıylady, kópten beri saǵynyp júrgen klassıkalyq baletten biraz sýsyndadyq», - dedi ol.

    Baletqumar Tereza Greko «Astana Opera» trýppasynyń ónerine osymen ekinshi ret kýáger bolǵanyn aıtady. «Ótken keshte men «Spartak» spektaklin tamashaladym, bıshilerdiń deńgeıi jaqsy, ártister qataryn buzǵan joq, nyq-nyq jáne túzý qımyldady. Búgin men Gala balette boldym, qazaq bıi biz úshin buryn-sońdy kórmegen óner ekenin aıtqym keledi, keremet eken. Qymbat kostıýmder, ulttyq naqyshtar, sán-saltanatqa kóziń toımaıdy. Trýppanyń sheberliginde min joq, men tánti boldym! «Astana Opera» ujymyna búgingi kesh úshin alǵysymdy bildirgim keledi», - dedi T. Greko.

    Mádenıet
    bez avtora
    bez avtora
    Avtory