Italıandyq ánshi Son Paskaldyń qazaq tilindegi ánge túsirilgen beınebaıany Eýropada aınalymǵa shyǵarylady
ALMATY. 5 shilde. QazAqparat - Búgin Almatyda belgili ıtalıandyq ánshi Son Paskal «Aınalaıyn» beınebaıanynyń tusaýkeserin ótkizdi. Beınebaıan maýsym aıynda Ońtústik Italııada túsirilipti. Qazaq jáne ıtalıan tilindegi ándi ol tanymal kompozıtor Albano Karrızımen (Felicita, Ci Sara, Sharazan tanymal hıtteri; 65 mıllıon dıskisi satylǵan) birlese jazyp, oryndaǵan.
Beınebaıan shilde aıynan tamyzǵa deıin Italııanyń ulttyq tele jáne radıo arnalarynan, eń aldymen, Deejay dep atalatyn iri medıaholdıngte kórsetiletin bolady, onda úlken jetistikpen 20 serııalyq Paskaldyń Qazaqstandaǵy oqıǵalary týraly Pascalistan realıtı-shoýy kórsetilgen bolatyn. Atalǵan shoýdyń reıtıngisi kóterilgeni sonshalyq, tipti telearna ekinshi kezeńine tapsyrys beripti. Ánshiniń shyǵarmashylyǵy Qazaqstanda da tanylyp úlgergen.
