Italıandyq ánshi Son Paskal Astanada bir tıyn shyǵynsyz beınebaıan túsirdi

Qazaq tilinde án aıtyp, halqymyzdy álemge tanytyp júrgen ónerpaz óziniń tyńdarmandaryn kezekti jańalyǵymen qýantyp qana qoımaı, bul joly tipti tańǵaldyrdy. Ol qolyna kamera alyp, jańa týyndysy - «Mahabbat» ánin aıta júrip, bir kúnde Astana qalasyn aralap shyqqan. Saparyn basty kóshelerden bastaǵan ánshi Esil boıynyń kórikti jerlerin, qalalyq №4 mektep, Gýmılev atyndaǵy Eýrazııa ulttyq ýnıversıteti, áýejaı, «Han shatyr», «Kerýen» oıyn-saýyq ortalyqtary men sporttyq jattyǵý oryndaryn aralap bárin beınebaıanǵa túsirip otyrǵan. Bul joly ózin ánshi, sazger retinde ǵana emes, sonymen birge operator jáne rejısser retinde tanytqan Son Paskaldyń «Mahabbat» ániniń sózin jas aqyndar jazsa, sazyn ánshiniń ózi shyǵarǵan. Ondaǵy negizgi taqyryp - ǵashyqtyq pen súıispenshilik.