Italıan aýylynyń turǵyndaryna ólýge tyıym salyndy
ASTANA. 15 naýryz. QazAqparat - Italııanyń ońtústigindegi Falchano del Massıko aýylynyń meri turǵyndardyń ólýine tyıym saldy, dep habarlaıdy Lenta.rý La Stampa-ǵa silteme jasaı otyryp.
«Jergilikti turǵyndar men aýyl qonaqtaryna bul álemdi tastap, o dúnıege attanýǵa tyıym salynady» delingen 5 naýryzda kúshine engen mer Djýlıo Chezare Favanyń buıryǵynda.
Merdiń mundaı áreketke barýyna ózi basqaratyn aýyldyń aýmaǵynda zırattyń, oǵan arnalǵan jer teliminiń joqtyǵy sebep bolypty. Jýyrǵa deıin aýyl turǵyndary Karınol atty kórshi qalashyqtyń jerin paıdalanyp kelgen. Falchano aýyly 1964 jyly osy qaladan bólinip shyqsa da, ekeýiniń zıraty ortaq bolypty. Uzaq ýaqyt boıy qala basshysy «zırat kólemin úlkeıtip, bir bóligin aýyl turǵyndaryna beremiz» dep kelse de, másele sıyrquıymshaqtanyp sozylyp ketken. Sondyqtan da basqa amaly qalmaǵan aýyldyń meri osylaısha «aıdy aspanǵa shyǵaryp otyr».
Onyń aıtýynsha, aýyldyń ózine deıingi basshysy jańa zırattyń jobasyn jasamaq bolǵan, alaıda onyń qymbatqa túskeni sonsha, aýyl bıýdjeti jetpegen kórinedi.
«Meniń buıryǵym - arandatýshylyq ekenin moıyndaımyn. Alaıda basqa amalym qalmady. Árıne, bul másele adamdardyń ashýyn týǵyzdy. Jergilikti turǵyndar buıryqqa qarsy myńdaǵan daýys jınap úlgerdi, alaıda jergilikti jer qojaıyndary ózderiniń ýchaskelerinen zıratqa oryn bere batady» - deıdi Fava. Al Il Messagero saıty turǵyndar aýyl meriniń sheshimin qýana qabyldapty dep jazýda.
Ne degenmen, 5 naýryz kúni aýyldyń eki qart turǵyny merdiń sózin «tyńdamaı», qaıtys bolyp ketipti.
Al Fava jýyrda zırat úshin eń qolaıly degen jer telimderin tańdap, Karınol qalasynyń basshylary arasynda qalǵan zańdyq máselelerdi sheshýge kirispekshi.
Djýlıo Chezare Fava mamandyǵy boıynsha kardıolog. Ol 3700-den astam turǵyny bar Falchano del Massıko aýlynyń meri bolyp 2007 taǵaıyndalǵan bolatyn.
