IT tehnologııalar salasyn belsendi qoldaımyz – Oljas Bektenov

ASTANA. KAZINFORM – Keıingi 5 jyl ishinde otandyq IT qyzmetterdiń eksporty 20 ese ulǵaıyp, jyl qorytyndysy boıynsha 600 mln dollardan asty. Bul týraly Úkimet basshysy Oljas Bektenov málim etti. 

«Búginde IT ındýstrııa – jahandyq ekonomıkadaǵy eń jyldam damyp kele jatqan salalardyń biri. Qazaqstan álemde tsıfrlandyrý salasy damyǵan eń ozyq 30 memlekettiń qataryna kiredi jáne onlaın-qyzmetter kórsetý boıynsha 8-orynda tur. Bizdiń elimizde robottandyrý jáne jasandy ıntellekt tehnologııalary ornyqty damyp keledi. Kúndelikti ómirdegi qyzmetterdiń tsıfrlyq transformatsııasy jalǵasyp jatyr. Qajetti zańnamalyq baza qurylyp, ony únemi jetildirý jumystary jolǵa qoıyldy. Tsıfrlyq transformatsııa tujyrymdamasy qabyldandy, sondaı-aq venchýrlik naryqty jáne startap-ekojúıeni damytý úshin qolaıly ekonomıkalyq jaǵdaılar jasaldy», - dedi Oljas Bektenov Úkimet otyrysynda. 

Premer-mınıstrdiń aıtýynsha, búginde Astana-hab tehnoparkinde 1,5 myńnan astam kompanııa tabysty jumys istep jatyr. 

«Ótken aptada men Astana-habqa arnaıy baryp, jasandy ıntellekt jáne tsıfrlyq tehnologııalar salasyndaǵy otandyq jobalarmen jáne startaptarmen tanystym. Bul salalarda naqty jetistikter bar. Aldaǵy ýaqytta da IT tehnologııalar men kórsetiletin qyzmetter salasyn belsendi qoldaımyz. Keıingi 5 jyl ishinde otandyq IT qyzmetterdiń eksporty 20 ese ulǵaıyp, jyl qorytyndysy boıynsha 600 mln dollardan asty. Óńirlik akseleratsııalyq baǵdarlamalardy jáne basqa elderdegi jahandyq áriptestik jelini damytý saıasatyn odan ári jalǵastyrý kerek», - deıdi O. Bektenov. 

Buǵan deıin Oljas Bektenov óńirlerde tsıfrlyq ınfraqurylym tolyq qamtamasyz etilmegenin atap ótti. Onyń aıtýynsha, ákimdikter bul máselege jetkilikti kóńil bólmeıdi. 

Sondaı-aq Úkimet basshysy IT habtar men venchýrlik qorlar ekonomıkanyń basty draıverine aınalýy tıistigin aıtty.