IT tehnologııalar men áleýmettik jeliler ústem qurǵan zamanda jańa ádebıet jasap jatyrmyz – Aqberen Elgezek
«Búgingi ádebı protsess burynǵy ýaqyttaǵy úderisterden áldeqaıda basqa. Biz búgin túrli aqparattyq tehnologııalar men áleýmettik jeliler ústem quryp turǵan zamanda jańa ádebıet jasap jatyrmyz. Onyń jaqsy jaǵy da, teris jaǵy da bar. Jaqsy jaǵy – qysqa jazylǵan dúnıe ǵalamtor arqyly oqyrmanǵa tez jetedi, tez oqylady, tez taralady. Alaıda bul jaǵdaıda úlken, irgeli, bylaısha aıtqanda kitap formasyna ǵana sııatyn shyǵarmalar azǵantaı tutynýshy ortanyń nesibesine ǵana aınaldy», - dedi A. Elgezek elordada QR Mádenıet jáne sport mınıstrliginiń alqa otyrysynda.
Óz sózinde spıker burynǵydaı sapaly kásibı ádebı taldaýlar azaıǵanyn, syn janry da az-kem toqyraýǵa túsip turǵanyn aıtty.
«Qazir tek áleýmettik jelilerde birjaqty aıtylatyn pikirler ǵana bar, onyń deńgeıi de osynda otyrǵan azamattarǵa belgili dep esepteımin. Degenmen kórkem ádebıet qashanda bolǵan. Adamzat barda ol jasaı da beredi. Nebir zulmat dáýirlerde, soǵys jáne ashtyqta da qazaqta ádebıet jasaldy - órkendegen tustary da boldy, tsenzýraǵa ushyraǵan zamandardy da bastan keshirdi. Sonda da tól ádebıetimiz qazaqtyń kórkem álemin ulǵaıtyp otyrdy. Búginde jańa zaman ádebıeti jasalý ústinde. Álbette, biz dáýir suranystary men zaman talaptaryna saı ıkemdelip otyrmyz. Ádebıetke jyl saıyn jańa tolqyn jastardyń kelip jatqany – sonyń aıǵaǵy. Olardyń oılaý paradıgmasy, dúnıeni sezinýi men jazý stıli de bólek, óz aýdıtorııalary bar. Jańa ádebı lıderler qalyptasyp jatyr. Bul qýanyshty tendentsııa. Árıne, úlken býyn men jańa býyn arasyndaǵy moıyndaý-moıyndamaý degen bolǵan, bola beredi de. Bir sózben aıtqanda, ádebı protsess eshqashan toqtamaıdy», - dedi Aqberen Elgezek.
