IT sarapshy: kassır, bank menedjeri, grafıkalyq dızaıner mamandyqtary joıylýy múmkin
ASTANA. KAZINFORM - 2030 jylǵa deıin birshama mamandyq joıylyp, olardyń ornyn jasandy ıntellekt basýy múmkin. Soǵan sáıkes, «Búgin LIVE» baǵdarlamasynda qonaq bolǵan ІT salasy boıynsha sarapshy jas túlekterge suranysqa saı salalardy tańdaýdy usyndy.
– Osydan 4-5 jyl buryn Qazaqstanda kásibı baǵdar boıynsha platforma jasaǵanmyn. Sol kezde kóptegen mektep oqýshylarymen sóılestim. Mektep bitirýshi túlekterden qandaı mamandyq tańdaıtynyn surasań, kóbi baıaǵy klassıkalyq mamandyqtardy ataıdy. Sebebi olarǵa ata-analary bolmasa basqa da jaqyndary osyndaı keńes bergen. Sonda men bul balalarǵa kásibı baǵdar berý kerek ekenin túsindim. ІT salasyn jaqsy biletinimdi paıdalanyp, osy baǵytta ne isteýge bolady degendi oılana bastadym. Sóıtip, 3 jyl ishinde myńnan astam balany robot tehnıkasy men baǵdarlamalaýǵa úıretip shyqtyq, - deıdi Ǵızat Mahanov.
Astrobot robototehnıka jáne baǵdarlamalaý ortalyǵynyń negizin qalaýshy maman jastardyń nege kóbine klassıkalyq mamandyqtardy tańdaıtynyn túsindirdi.
– Jasóspirimder ІT salasyn tańdamaýynyń sebebi retinde onda matematıka bar ekenin alǵa tartady. Al, matematıkaǵa kóp balanyń betteı bermeıtini belgili. Hımııa, fızıka, bıologııa pánderi boıynsha da osyndaı máseleler bar. Bul tek mekteptegi pánderge qaraı qabyldanǵan qate sheshim degim keledi. Balalardy zerthanalarǵa aparyp, naqty jumystardy kórsetý kerek. Kásibı baǵdar degen – balalardyń naǵyz jumys barysymen tanysýy. Bul klassıkalyq, gýmanıtarlyq mamandyqtar kerek emes degen sóz emes. Biraq adam mamandyǵyn tańdaǵanda zamanaýı, suranystaǵy mamandyqtarǵa bet burǵany jón – deıdi sarapshy.
Ǵızat Mahanov oǵan qosa aldaǵy ýaqytta qandaı mamandyqtar joıylýy múmkin ekenin de aıtty.
– Aldaǵy ýaqytta derekterdi kompıýterge engizetin mamandyqtar, kassır, bank menedjeri, grafıkalyq dızaıner mamandyqtary joıylyp ketýi múmkin. Bul – meniń pikirim emes. Dúnıejúzilik ekonomıkalyq forým ár 5-6 jyl saıyn osyndaı zertteý júrgizip turady. Soǵan sáıkes, osy mamandyqtar 2030 jylǵa deıin qajet bolmaı qalady degen boljam bar, – deıdi ol.
Osyǵan deıin Astanada qoqysty shyǵarý marshrýttaryn ońtaılandyrý úshin jasandy ıntellekt paıdalanylatyny týraly jazdyq.