It pen mysyǵyn esepke qoımaǵandarǵa qansha aıyppul salynady
ASTANA. QazAqparat – 1 qyrkúıekten bastap ıt pen mysyǵyn esepke qoımaǵan azamattarǵa aıyppul salynady. Bul týraly Orman sharýashylyǵy jáne janýarlar dúnıesi komıtetiniń bas sarapshysy Talǵat Erdeshev aıtty, dep habarlaıdy QazAqparat tilshisi.
«10 mysyǵy, 5-6 ıti bolsa da esepke qoıýy kerek. Bul mindetten jaltarǵandar jaýapqa tartylady. Sebebi, adamdar ózderiniń úı janýarlaryna jaýapkershilikpen qaraýy tıis. «Ákimshililik quqyq buzýshylyq týraly» kodekstiń 407-1, 407-2-baptarynda jeke tulǵalarǵa 10 aılyq eseptik kórsetkish, zańdy tulǵalarǵa 20 AEK mólsherinde aıyppul kózdelgen. 1 jyldyń ishinde esepke qoımaǵany anyqtalǵan jaǵdaıda aıyppul kólemi 2 eselenedi», - dedi komıtettiń bas sarapshysy elordada ótken brıfıng barysynda.
Aıta keteıik, «Janýarlarǵa jaýapkershilikpen qaraý týraly» QR Zańyna sáıkes, bıyl 1 qyrkúıekten bastap mysyqtar men ıtterge chıp taǵý jáne olardy arnaıy esepke qoıý mindetti bolady.
Qazaqstandyqtar úshin elektrondy júıege janýarlary týraly aqparatty engizý – tegin. Degenmen, chıp taǵý úshin mysyq pen ıt ıeleri óz qaltasynan aqsha tóleýi tıis. Ony óteýge múmkindigi joq áleýmettik osal toptaǵy azamattarǵa qyzmet túri tegin bolmaq.
