ІT-mektepterde bilim alý úshin jyl saıyn vaýcherler bólinedi

NUR-SULTAN. QazAqparat - Qazaqstanda jyl saıyn jeke ІT-mektepterde bilim alý úshin IT-vaýcherler bólinetin bolady. Bul týraly QR tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Qazaqstanǵa resmı saparmen kelgen Úndistannyń Syrtqy ister jáne mádenıet mınıstri Mınaksha Lekhımen kezdesýinde aıtty, dep habarlaıdy QazAqparat.

Mınıstrliktiń habarlaýynsha, sonymen qatar Baǵdat Mýsın Qazaqstannyń IT salasyndaǵy kadr tapshylyǵy máselesi qalaı sheshiletini týraly aıtyp berdi.

«Tsıfrlyq transformatsııany júrgizý úshin joǵary bilikti IT-mamandardyń bolýy mańyzdy. Qazaqstanda jyl saıyn jeke ІT-mektepterde bilim alý úshin IT-vaýcherler bólinetin bolady. Bul – IT-mamandyǵyn ıgerýge nemese osy mamandyqqa aýysýǵa nıet bildirgen kisiler úshin jaqsy múmkindik. Bizdiń boljam boıynsha 2025 jyly 20 myń vaýcher shyǵarylady. Osy oraıda úndi kompanııalaryn bilim jobalaryna qatysýǵa shaqyramyn», - dep atap ótti Tsıfrlyq damý mınıstri.

Budan basqa, QR tsıfrlyq damý, ınnovatsııalar jáne aeroǵarysh ónerkásibi mınıstri elimizde proaktıvti qyzmet kórsetý baǵytyna basa nazar aýdarylyp otyrǵanyn, «tsıfrlyq qujattar» servısi iske qosylǵanyn, elektrondyq tsıfrlyq qoltańbany alý qashyqtyq formatqa aýystyrylǵanyn atap ótti.

«Bizdiń mınıstrlik Úndistanmen AKT, elektrondyq basqarý, aqyldy qala, ІT-mamandardyń biliktiligin arttyrý, telekommýnıkatsııa, kıberqaýipsizdik, ǵarysh salasynda seriktestik jáne tıisti agenttikter, tehnoparkter, venchýrlyq qorlar men kásiporyndar arasynda áriptestik ornatýǵa nıet bildirip otyr»- dedi Baǵdat Mýsın.

Sheteldik delegatsııa atalǵan salalarda yntymaqtastyqqa daıyn ekendigin jetkizdi.