IT mamandarǵa arnalǵan 1 mlrd: Qaraǵandyda tehnologııa marafony bastaldy
Komandalar ónerkásipke tsıfrlyq tehnologııany engizýge baǵyttalǵan óz jobalaryn tanystyra otyryp, qatty paıdaly qazbalardy óndirý jáne óńdeý salasyndaǵy segiz keıstiń biri boıynsha mindetterdi sheshýi tıis.
Bir mindetti sheshýge 320 mıllıon teńgege deıin grant beriledi. Prezentatsııadan keıingi eń úzdik jobalardy qazylar alqasy anyqtaıdy.
Marafonnyń ashylýyna Qaraǵandy oblysynyń ákimi Ermaǵanbet Bólekpaev qatysty. Ol qatysýshylarǵa sáttilik tiledi.
Prometeo Chain System KZ Ltd komandasy marafonǵa Astanadan kelgen.
Kompanııa óndiristik kásiporyndar úshin jańartylǵan pozıtsııalaý jobasyn usyndy.
Ol personaldyń nemese jabdyqtyń, jyljymaly tehnıkanyń ornalasqan jerin jer betinde de, jer astynda da birneshe santımetrge deıin dál anyqtaýǵa múmkindik beredi.
«Óndiriste biz belgili bir nysannyń ornalasqan jerin aımaq boıynsha anyqtaýǵa múmkindik beretin ártúrli baǵdarlamalardy qoldanamyz. Nysannyń qaı jerde ekenin bilesiz, biraq ornalasqan jerin santımetrlik dáldikpen jáne onyń bıiktigin bilmeısiz. Biz usynatyn tehnologııanyń arqasynda shartty túrde adamnyń ornalasqan jerin, onyń koordınattaryn ǵana emes, sonymen qatar onyń bıiktigin de anyqtaýǵa bolady. Bul - joǵary dáldiktegi navıgatsııa. Jobamyzdyń jeke sheshimderin satamyz jáne olar Italııa, AQSh jáne Qytaı óndiristerinde qoldanylady. Óıtkeni, pozıtsııalaýdan basqa, biz beriletin derekterdi qorǵaýdy da usynamyz», – deıdi komanda ókili Dmıtrıı Zernov.
Qaraǵandylyq ázirleýshiler toby kásiporyndardyń taýarlyq-materıaldyq qundylyqtaryn esepke alýǵa múmkindik beretin aqyldy qoıma jobasyn usyndy.
«Bizdiń joba, árıne, biregeı emes. Mundaı baǵdarlama kóptegen kompanııalarda engizilgen. Biraq bizdiń ereksheligimiz – birneshe tehnologııany qoldanamyz, sımbıoz jasaımyz. Jańasyn jasamaımyz, qazirgisin jaqsartamyz. Naryqta úsh jyldan beri jumys istep kelemiz. Bizdiń basty mindetimiz – bıznes-protsesterdi avtomattandyrý, robottarǵa kúndelikti mindetter berý jáne avtomattandyrýdyń tolyq tsıklin júrgizý», – deıdi «A-Bıznes Qazaqstan» JShS basshysy Tımýr Dúrmaǵambetov.
Sondaı-aq qatysýshylar qaldyq qoımasynyń tereńdigin anyqtaý úshin tsıfrlyq tehnologııanyń ǵylymı-qoldanbaly ádisin engizý mindetteriniń sheshimderin, sondaı-aq eldi mekenderdiń, olardyń ınfraqurylymy men kólik kommýnıkatsııalarynyń mańynda burǵylaý-jarý jumystaryn qaýipsiz júrgizý úshin zııandy jarylys ónimderiniń (shań-gaz bultynyń) shyǵaryndylaryn azaıtý jáne taý-ken massasynyń jekelegen bólikteriniń ushý radıýsyn azaıtý jobalaryn usynady.
«Іs-sharany uıymdastyrýshy – «Terrıkon alqaby» ІT Hub jáne bizdiń basqarmanyń qoldaýymen Tech Garden brendimen áreket etetin «Innovatsııalyq tehnologııalar parki» derbes klasterlik qory. Qatysýshylar tsıfrlyq tehnologııalar men jasandy ıntellekt kómegimen segiz keıs sheshedi. Usynylǵan jobalar taý-ken metallýrgııa salasyn jańa deńgeıge shyǵarýǵa, onyń ishinde protsesterdi avtomattandyrýǵa, ekologııalyq paıda ákelýge, barynsha tıimdilikke qol jetkizýge jáne kásiporyndarda jańa tehnologııalardy engizýge múmkindik beredi», – dep atap ótti Qaraǵandy oblysynyń aqparattandyrý, memlekettik qyzmetter kórsetý jáne muraǵattar basqarmasynyń basshysy Rýstam Baıjanov.
Tech Garden osyndaı marafondardy aı saıyn ótkizedi.
Marafondardyń júlde qory da, qatysýshylar sany da ýaqyt óte kele artyp keledi.
Qazaqstan boıynsha marafon ótkizý kezinde jalpy somasy 16,3 mıllıard teńgege 185 joba qarjylandyryldy.
