IT-klasterdi damytý jańa ekonomıkalyq múmkindikter ashady – Álıhan Smaıylov
Álıhan Smaıylov osy jyldyń mamyr aıynda iske qosylǵan MOST IT Hub Almaty ınnovatsııalyq kásipkerlikti damytý ortalyǵyna bardy.
Jalpy aýdany 5 200 sharshy metrlik ortalyqta keńseler, kovorkıng-keńistikter, ıvent jáne bıznes-kezdesýler ótkizýge arnalǵan aımaqtar ornalasqan. Sondaı-aq ortalyq bazasynda tehnologııalyq startaptardy qoldaý baǵdarlamalary júzege asyrylady, ınvestorlar men venchýrlik qorlar ókilderiniń qatysýymen taqyryptyq is-sharalar ótkiziledi.
Premer-Mınıstr IT-klasterdi damytý qazaqstandyqtar úshin jańa ekonomıkalyq múmkindikter ashatynyn atap ótti.
«Qalada jekemenshik ınnovatsııalyq habtar men bıznes-ınkýbatorlar kóbeıip keledi, iri IT jáne kreatıvti kompanııalar quryldy. Almatyny úlgi etip, elimizdiń barlyq oblys ortalyqtarynda IT-habtar iske qosylýy tıis. Óńirlerdiń ákimdikteri Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, osy baǵyttaǵy jumysty kúsheıtýi qajet», — dedi Álıhan Smaıylov.
Sonymen qatar Premer-Mınıstr eresekter men balalarǵa ambýlatorııalyq-emhanalyq kómek kórsetetin Mediker Hospital International jańa kóp beıindi medıtsınalyq ortalyǵynyń qyzmetimen tanysty.
Ortalyqta stomatologııalyq kabınet, sporttyq medıtsına, fızıoterapııa jáne ońaltý bólimi, MRT, KT, rentgen dıagnostıka jáne mammografııa kabınetteri, telemedıtsına kabıneti, eki operatsııalyq zal jáne táýlik boıy jumys isteıtin statsıonar bar.
«Qazaqstanda medıtsınanyń birqatar baǵyttary halyqaralyq deńgeıde tabysty básekege túse bastady. Joǵary tehnologııalyq medıtsınalyq qyzmetterdiń qoljetimdiligi qamtamasyz etilip, densaýlyqtyń negizgi kórsetkishteri jaqsarýda. Telemedıtsınanyń arqasynda azamattar óz eldi mekenderinen shyqpaı-aq joǵary kásibı kómek ala alady», — dedi Álıhan Smaıylov.
Premer-Mınıstr dárigerlerdi aldaǵy kásibı mereke – Medıtsına qyzmetkeri kúnimen quttyqtady.
Sondaı-aq Úkimet basshysy «Jas maman» jobasy aıasynda túrli oqý-óndiristik sheberhanalarmen jabdyqtalǵan Almaty jolaýshylar kóligi jáne tehnologııalar kolledjine bardy.
Bul — Mashına jasaýshylar odaǵy, Hyundai Center jáne Allur Auto sııaqty seriktestermen birge qalalyq kólik úshin kadrlar daıarlaıtyn jalǵyz kolledj.
«Prezıdenttiń tapsyrmasymen elimizde kásiptik-tehnıkalyq bilim berýdi damytý boıynsha júıeli sharalar qabyldanyp jatyr. Bul kolledj – qalanyń jetekshi oqý oryndarynyń biri. Munda jastar avtoslesar, elektromonter, tokar, dánekerleýshi jáne qazirgi tańda suranysy joǵary basqa da mamandyqtardy meńgeredi. Qala ákimdigi qaladan tys jerlerden kelgen stýdentterdi jataqhanamen qamtamasyz etý, sondaı-aq túlekterdiń jumysqa ornalasýyna járdemdesý boıynsha naqty sharalar qabyldaýy qajet», — dedi Álıhan Smaıylov.
Premer-Mınıstr stýdentterdiń SBB stanoktarynda tokarlyq, frezerlik jumystar, avtomobılderdi jóndeý jáne qyzmet kórsetý boıynsha Worldskills qalalyq jáne respýblıkalyq chempıonattaryndaǵy jeńisi kolledjdiń sózsiz jetistigi ekenin aıtty.
